Dritan Dajti flet nga qelia: Policët erdhën të më vrisnin, pa pranga, më lidhen me kabllo

By opozita.com
In Kryesore
Oct 14th, 2013
0 Comments
0 View

dajtiDritan Dajti, interviste nga qelia per gazeten “Panorama”: Oficerët ishin civilë, Prokuroria ua ktheu rrobat familjeve. Hapja e ‘Kutisë së Pandorës’? Është vetëm fillimi!

“Operacioni i Policisë më 7 gusht 2009 kishte për qëllim vrasjen time. Asnjë polic nuk pati pranga me vete, ndaj më lidhën me një kabllo elektrik”. Dritan Dajti “godet” sërish, duke ngritur dyshime mbi shkaqet e vërteta të ngjarjes ku humbën jetën katër punonjës policie.

Dajti hedh dritë mbi fakte që ai vetë i quan “të vërteta të hidhura për Policinë e Shtetit”. I akuzuari për vrasjen e katër policëve këmbëngul se është qëlluar me armë pa leje, nga persona civilë, të maskuar, të cilët i kanë marrë edhe shumën 150 mijë euro që kishte në makinë. Dajti tregon “mëkatin” e një prej armëve, që rezultojnë të tërhequra nga magazina prej policëve të varë pas vdekjes së tyre. “Me armën që Altin Dizdari ka marrë tre muaj pas vdekjes së tij është kryer vrasje”, pretendon Dajti. I pandehuri i Krimeve të Rënda lëshon një lumë akuzash mbi Policinë e Shtetit dhe Prokurorinë, që sipas tij kanë zhdukur provat.

Sipas Dajtit, pas fshehjes së provave qëndron frika nga klane të caktuara në Policinë e Shtetit, si dhe korrupsioni në radhët e Prokurorisë dhe Policisë. Sa për “Kutinë e Pandorës”, të lajmëruar prej tij prej kohësh, ai pranon se “çfarë kam thënë deri më tani është vetëm fillimi” dhe paralajmëron se do të publikojë falsifikimin dhe korrupsionin në një pjesë të Policisë së Shtetit. Në lidhje me ngërçin që ka kapluar procesin e tij gjyqësor, Dajti shikon vetëm një rrugëdalje: nisjen nga e para me një tjetër trup gjykues. 

Pak ditë më parë dështoi seanca e 240-të e procesit tuaj te Krimet e Renda. Ju akuzoni Gjykatën dhe Prokurorinë për zvarritje të procesit. Sipas jush, si mund të dalë nga ngërçi?
Tani pranohet nga të gjithë që procesi gjyqësor ndaj meje ka dështuar. Mendoj se ky proces duhet të fillojë nga fillimi me një tjetër trup gjykues, sepse mua më janë shkelur shumë të drejta, jo vetëm nga Prokuroria, por edhe nga Gjykata gjatë gjykimit. Më kanë hequr të drejtën e mbrojtjes me avokat, edhe pse Kodi i Procedurës Penale, Kushtetuta dhe Konventa Europiane për të Drejtat e Njeriut e detyron Gjykatën të më vendosë avokat kur nuk kam mundësi të gjejë të tillë. Më kanë hequr të drejtën të gjykohem nga një gjyqtar i paanshëm dhe i drejtë. Gjykata në asnjë rast nuk ka pranuar që procesi të regjistrohet audio. Në rastet kur janë pyetur si dëshmitarë oficerët e Policisë, Gjykata ka falsifikuar procesverbalet. Gjykata nuk ka pranuar kërkesën time që Byroja për mbrojtjen e të burgosurve të më mbronte në gjykim. Gjykata në shumë raste më ka hequr të drejtën për të pyetur dëshmitarët. Nuk ka pranuar asnjëherë që mua të më hiqet predha tjetër që kam në trup nga qitjet me armë zjarri që janë bërë ditën e ngjarjes. Predha që më është hequr ka rezultuar se nuk u përket armëve të sekuestruara policëve të pranishëm në vendin e ngjarjes. Gjykata është treguar çnjerëzore ndaj meje në rastet e gjyqit me dyer të mbyllura, kur nuk ka pranuar të ndërpresë seancën, pavarësisht gjendjes sime së rëndë shëndetësore dhe më janë bërë injeksione në sallën e gjyqit, pasi më kishte rënë të fikët. 

Gjatë procesit janë thirrur 119 avokatë kryesisht. Përveç njërit prej tyre, që kërkoi pagesën 200 mijë euro, të tjerët nuk janë paraqitur, ose nuk kanë marrë përsipër mbrojtjen. Keni ndonjë ide pse ka ndodhur kjo?
Avokatët nuk mund të bëhen shërbëtorë të Gjykatës apo Prokurorisë për të rënduar pozitën e të pandehurit. Asnjë avokat i ndershëm dhe profesionist nuk do të pranonte të merrte përsipër një proces me kaq shumë shkelje të ligjit. Për mendimin tim, u takon Prokurorisë dhe Gjykatës të zgjidhin çështjen dhe nuk është aspak e drejtë që të fajësohen avokatët që nuk duan të bëhen pjesë e manipulimit ndaj meje. 

Në seancën e fundit deklaruat se oficerët e Policisë kanë qenë pa uniforma në operacion. Me çfarë e provoni këtë pretendim?
Të gjitha provat provojnë se Fatos Xhani, Altin Dizdari, Kastriot Feskaj dhe Sajmir Duçkollari kanë qenë veshur civilë në momentin e vrasjes. Sipas të gjitha akteve në dosjen hetimore, figuron se Fatos Xhani mban veshur në momentin e vrasjes këto veshje: bluzë ngjyrë vjollcë, këpucë kafe dhe xhinse blu. Altin Dizdari mbante veshur bluzë ngjyrë ulliri, pantallona doku ngjyrë gri dhe atlete gri. Kastriot Feskaj mbante triko sintetike me ngjyrë të kuqe dhe me shirita të bardhë paralelë, xhinse lejla dhe atlete ngjyrë qumështi. Sajmir Duçkollari mbante veshur këmishë të verdhë me kuadrate blu, pantallona bezhë dhe atlete ngjyrë kafe në bezhë. Të gjitha këto veshje civile që kanë pasur katër viktimat në momentin e vrasjes janë parë nga tre oficerë të Policisë Gjyqësore gjatë këqyrjes, si dhe nga eksperti kriminalist Fatos Konea dhe të katër këta kanë përpiluar procesverbalet përkatëse se katër viktimat ishin të veshur civilë. I njëjti fakt konfirmohet edhe nga ekspertët mjekoligjorë Gjergji Syko, Fatos Sinani dhe Elmaz Shaqiri, të cilët kanë firmosur që katër viktimat kanë qenë të veshur civilë në momentin e vrasjes së tyre. Gjithashtu, kemi edhe procesverbalet e sekuestrimit të këtyre veshjeve nga oficerët e Policisë Gjyqësore. Këtyre veshjeve civile u janë bërë edhe ekspertime biologjike, kimike dhe teknike me qëllim për të provuar nëse këto veshje civile i mbanin veshur katër viktimat në momentin e vrasjes. Në përfundim të analizave, ekspertët kanë mbërritur në konkluzionin se ato mbaheshin veshur nga viktimat në momentin e vrasjes. Sipas akteve të ekspertimit rezulton se në vend të gradave dhe shenjave dalluese të Policisë së Shtetit, katër viktimat mbanin veshje me stampa të firmave prodhuese. Punonjësit e Policisë që janë gjallë dhe që kanë qenë në vendngjarje atë ditë, e pranojnë edhe vetë në dëshmitë para Gjykatës se disa prej tyre kanë qenë me rroba banjo, disa me pantallona të shkurtra dhe disa ma shapka. Deri më sot, Prokuroria dhe Gjykata janë munduar ta fshehin faktin që katër viktimat kanë qenë të veshur civilë në vendin e ngjarjes. 

Ku gjenden tashmë këto veshje?
Një skandal edhe më i madh ka ndodhur me rrobat civile që mbanin veshur viktimat në momentin e vrasjes. Prokurorët, në mënyrë të qëllimshme kanë zhdukur këto prova materiale, me arsyetimin idiot se këto veshje ua kanë kthyer familjeve të viktimave, meqë ishin rroba civile dhe nuk ishin rroba ushtarake që i përkisnin Policisë së Shtetit. Në këto momente, Prokuroria dhe Gjykata nuk kanë më asnjë provë që të më akuzojnë, apo të më dënojnë mua, se katër viktimat ishin me cilësitë e dukshme si policë gjatë kryerjes së detyrës në momentin vrasjes….

Comments are closed.