Franca në Durrës me anije 30 vjeçare dhe kapitene simpatike

Shkruan: Gjergj Thanasi, Tiranë

Në kuadrin e bashkëpunimit ushtarak franko-shqiptar në Portin e Durrësit po qëndron dragamina franceze “Lyre” M 648 e klasit “Tri-Partite”. Kjo dragaminë me tonazh 528 DWT do të marrë pjesë në stërvitje të përbashkët me forcat e mbrojtjes detare shqiptare. Stërvitja do të kryhet kryesisht me zhytësit shqiptarë. Sic u shpreh për shtypin kapitenia e anijes nuk do ketë probleme kompatibiliteti me zhytësit shqiptarë, ndonëse këta të fundit pajisjet e zhytjes, përfshirë dhomën hiperbarike i kanë italiane, madje edhe instruktorët e stërvitjes i kanë pasur italianë të ”Teseo Tesei-t”, bazës së stërvitjes për trupat speciale italiane “incursori di marina”.

france-2

Flota ushtarake belge dhe holandeze, që kanë në përbërjen e tyre dragamina si “Lyre” për shkak se ky klas dragaminash janë obsoleshente, ose ua kanë shitur indonezianëve, bullgarëve apo estonezëve, ose u kanë bërë modernizime rrënjësore si psh. belgët me sonarin e thellësisë “Double Eagle” të kompanisë “Saab-Bofors.” Francezët me përjashtim të dragaminës “Sagittaire”, që ju shit Pakistanit në 1992, vazhdojnë t’i mbajnë aktive të tilla dragamina, ndonëse pritet që “Thales Group” të fillojë modernizimin e këtij klasi dragaminash.
Kapitenia simpatike

france-3

Për përfaqësuesit e mediave shqiptare ishte një surprizë e këndshme që dragamina “Lyre” me moshë 30 vjecare komandohej nga togerja e anijes (ekujvalente e gradës major) 32 vjecarja simpatike Anne Sophie Borrod. Kapitene Ana u shpreh për mediat shqiptare se është e vetmja kapitene femër e një dragamine në Marinën Nacionale Franceze. Ajo tha se në dijeni të saj janë të paktën 10 femra në flotën franceze, që kanë të njejtën gradë me të. Kapitene Ana në vitin 2002, hyri në Shkollën e Detarisë (Ecole Navale), ndërsa duke filluar nga 12 janari 2016 komandon 43 burra dhe 2 femra në përbërje të ekujpazhit të dragaminës “Lyre”.

Asgjë e re për rrëzimin e helikopterit “Super Puma” në Liqenin e Shkodrës

Kol. Daniel Venturi, atashe ushtarak në Ambasadën Franceze në Tiranë (resident në Romë) ishte present gjatë qëndrimit të dragaminës “Lyre” në Durrës. Pyetjes sonë për konkluzionet e ekspertizës teknike për shkaqet e rrëzimit të helikopterit “Super Puma” EC 145 në Liqenin e Shkodrës, Kol. Venturi ju përgjigj se nuk ka asnjë informacion.

Kjo ekspertizë nuk po bëhet nga francezët, por nga gjermanët. Ky tip helikopteri, ndonëse prodhim i kompanisë “Eurokopter” dhe i blerë nga pala shqiptare në Francë, faktikisht prodhohet në uzinat gjermane dhe jo franceze, prandaj me ekspertizën e shkaqeve të fatkeqësisë ajrore po merret pala gjermane.