Sali Berisha vijoi sërish sulmin ndaj drejtësisë, teksa u shpreh në konferencën e radhës se ka amnistuar krime elektorale dhe se ka arrestuar e ndjekur penalisht liderët e opozitës.

Duke e cilësuar një sistem të keq, që nuk ka ekzistuar as në komunizëm, kreu i PD thotë se do të reformojë drejtësinë nëse vjen në pushtet.

“E kam theksuar dhe e theksoj se, PD-ja është e vendosur për një reformë të sistemit të drejtësisë. Pse? Sot çdo shqiptar për një çështje civile nëqoftëse nuk paguan çmimet e kokës rryshfet, do të presë 15 vite.

Sot qytetarët shqiptarë, janë të vetmit në Europë dhe botë, që nuk kanë një proces ligjor të drejtë. Iu mohohet një proces ligjor i drejtë. Defakto se, dejure e kanë. Defakto nuk kanë proces ligjor. “, u shpreh Berisha.

Berisha vijoi sulmet edhe ndaj gjyqtares Irena Gjoka, e cila vendosi masën e sigurisë ‘detyrim paraqitje’ ndaj tij për aferën Partizani, duke thënë se ka disa mbiemra.

“Tani më thuaj ti mua, ka drejtësi më këtu? Këtu nuk ka gjykatës më. Këtu defakto gjykatësi është bërë me të 4-mbiemra, Irena Gjoka. Por qytetarit i duhen gjykatës dhe kjo nuk mund të vazhdojë.

Nuk mundet. Jashtë çdo lloj standardi, kjo nuk mund të vazhdojë. Nuk mund të vazhdojë një drejtësi e cila në vit elektoral, ka guximin të amnistojë krime monstruoze elektorale që lidhen me zyrtarë të lartë, dhe në të njëjtën kohë arreston dhe ndjekje penale liderët kryesorë të opozitës”, shtoi Berisha.