Dy persona janë arrestuar në flagrancë ditën e sotme në qytetin e Vlorës.
Sipas njoftimit të policisë, shtetasit me iniciale E.I, 35 vjeç, dhe E.K, 30 vjeç, mbrëmjen e djeshme kanë vjedhur 30 litra naftë nga kantieri i aeroportit, ku ishin të punësuar.
Policia ka bërë të mundur sekuestrimin e sasisë së naftës e vjedhur dhe 2 celularët e të dyshuarve, ndërsa janë duke hetuar për zbulimin e plotë të rrethanave.
“Strukturat hetimore të Komisariatit të Policisë Vlorë, pas një pune intensive hetimore, duke administruar pamje filmike dhe prova të tjera, zbardhën rastin e një vjedhjeje në kantierin e aeroportit të Vlorës.
Për këtë rast, u arrestuan në flagrancë shtetasit E. I., 35 vjeç, banues në fshatin Akërni, Vlorë dhe E. K., 30 vjeç, banues në fshatin Kaninë, Vlorë.
Nga hetimet dyshohet se këta shtetas, më datë 23.02.2025, kanë vjedhur 30 litra naftë nga kantieri i aeroportit, ku ishin të punësuar.
Në cilësinë e provës materiale, u sekuestruan sasia e naftës e vjedhur dhe 2 celularë”, njoftoi policia.
