Për karrierë, pagë më të mirë dhe kushte më të mira jetese. Këto janë shkaqet kryesore të largimit të shqiptarëve, evidentuar në raportin Global të Migracionit për vitin 2024, hartuar nga Organizata Ndërkombëtare e Migracionit. Shqipërisë i kanë ikur kryesisht fuqi punëtore e kualifikuar por edhe me kualifikim të ulët, nënvizon raporti.
“Unë mendoj se sot më shumë se sa kurrë ne po përballemi me një realitet ku tashmë nuk është punëdhënësi që përcakton rregullat e lojës, por punëmarrësi”, tha për A2 CNN, Fatjon Dragoshi, ekspert i çështjeve të punësimit.
Kjo pasi, veçanërisht në sektorë si turizmi, fasoni dhe bujqësia, mungesa e punonjësve, jo vetëm po pengon zgjerimin, por po kërcënon edhe ekzistencën.
“Sepse shumë prej qytetarëve po tërhiqen nga vende perëndimore. Tashmë jo vetëm ata që janë në hall e në nevojë e që nuk kanë alternativa të tjera, por edhe ndër më të kualifikuarit prej nesh zgjedhin të ikin”, shton Dragoshi.
Raporti i ka kushtuar rëndësi edhe emigrimit të paligjshëm të shqiptarëve drejt Mbretërisë së Bashkuar, duke rrezikuar jetën në Kanalin Anglez në varka të vogla apo gomone. Emigrimi i shqiptarëve ka prodhuar pasoja negative në vend, pasi mungojnë punonjësit, cenohet produktiviteti i ekonomisë e nga ana tjetër skema e pensioneve po ‘vuan’ për kontribuues.
“Në këtë sens kompanitë në Shqipëri e kanë çështje jetë a vdekje, do të thosha janë gati të varura tërësisht veçanërisht ndaj të rinjtë. Ndaj planet e tyre të sipërmarrjes duhet të kenë në fokus punonjësin”, nënvizon eksperti i punësimit.
Vetë bizneset që janë dorështrënguar në paga, pasi rroga mesatare në sektorin privat në vend ka mbetur në më pak se 700 euro, po përpiqen që boshllëkun e krijuar nga mungesa e punonjësve ta mbushin me punonjës të huaj kryesisht nga vendet e treta.
