Sekretari i Përgjithshëm i Partisë së Lirisë, Tedi Blushi, ka zhvilluar një takim me diasporën në Athinë, të cilëve u ka prezantuar programin e PL-së dhe u ka premtuar 10 vite përjashtim nga tatimfitimi dhe taksat lokale, nëse kthehen dhe investojnë në Shqipëri.
Blushi u shpreh se “me Ilir Metën në Qeveri, ne do të krijojmë një Ministri të posaçme për Diasporën, jo për të organizuar evente, por një Ministri e cila do të ketë fokusin e saj kryesor pikërisht riintegrimin e bashkatdhetarëve tanë në Shqipëri”. Ai gjithashtu u bëri thirrje emigrantëve të regjistrohen deri më 4 mars, për të votuar më 11 maj.
“Ju ftoj të gjithëve, këto ditë të mbetura deri në 4 Mars, të regjistroheni për të votuar, sepse kjo është një mundësi historike për të cilën Partia e Lirisë ka qenë e para që e ka ngritur si nevojë dhe si domosdoshmëri, pra votën e Diasporës, por edhe si një shans që i jepet sot çdo shqiptari për t’u shprehur me votë dhe për të ndëshkuar me votë atë që dëboi nga Shqipëria mbi 1 milionë shqiptarë. Atë që ju ndau nga familja, atë që ju zhvlerësoi me 50% remitancat, atë që varfëroi prindërit tuaj, atë që i ka lënë në mizerabilitet gjyshërit dhe pensionistët shqiptarë”.
Fjala e plotë e Tedi Blushit:
Së pari dua t’ju falënderoj për pjesëmarrjen në këtë takim, sigurisht frymëzues dhe që sjell optimizëm të madh për ndryshimin e shumëpritur në 11 Maj. Dhe fakti që sot në këtë takim ju keni ardhur me fëmijët tuaj, na jep shpresë dhe mbi të gjitha tregon besimin që ju keni tek Partia e Lirisë dhe tek programi ynë i shkëlqyer 5 prioritete për 4 milionë shqiptarë plus.
Së pari dua t’ju përcjell përshëndetjet më të përzemërta të Presidentit të Partisë së Lirisë, Z. Ilir Meta, i cili prej më shumë se 4 muaj vijon të mbahet në izolim ekstrem, pa fakte dhe pa prova penale, pikërisht për faktin se të vërtetat e thëna prej tij me zë të lartë, kanë tronditur nga themelet Narkoregjimin. Këtë Narkoregjim, që siç e denoncoi në Mynih edhe Zv. Presidenti i SHBA, qëndron sot në këmbë se pasi ka shkelur të gjitha liritë dhe të drejtat e njeriut për çdo qytetar, mbasi ka dërguar mbi 1 milion shqiptarë në emigrim, tani burgos, heton dhe shantazhon drejtuesit e Opozitës, duke tentuar të grabisë edhe një mandat tjetër në kurriz të shqiptarëve.
Diaspora shqiptare në Greqi është një pasuri e madhe Kombëtare, që së bashku me minoritetin grek në Shqipëri, janë ura që lidhin dy popujt dhe dy kombet tona, duke i shërbyer forcimit të miqësisë të shkëlqyer, tradicionale dhe të fqinjësisë të mirë që ne kemi me Greqinë. Sigurisht duhet t’i jemi mirënjohës Greqisë jo vetëm se u hapi dyert qindra e mijëra bashkatdhetarëve tanë në këto vite, por edhe për mbështetjen e dhënë në procesin e Integrimit Europian të Shqipërisë. Por edhe pse Kryeministri ynë është përpjekur disa herë të fajësojë edhe Greqinë për mos hapjen e negociatave, unë dua t’ju them se ky është një mashtrim i madh.
Një mashtrim i madh sepse armiku kryesor i Shqipërisë, i të ardhmes europiane të vendit nuk ka qenë Greqia dhe nuk ka qenë asnjë vend tjetër i Bashkimit Europian, por ka qenë pikërisht Edi Rama dhe regjimi që ai ndërtoi në këto 12 vite.
Sepse nuk mund të shpjegohet tjetër se si ka mundësi që Serbia apo Mali i Ziqë që i hapën negociatat me BE shumë vite pas Shqipërisë, sot janë shumë para nesh në këtë proces.
Ka vetëm një arsye dhe ai quhet Edi Rama. Nuk është propagandë, nuk është politikë, nuk është retorikë, por është fakt. Sepse si kurrë ndonjëherë Shqipëria nuk është shpopulluar në një mënyrë kaq dramatike dhe me rritme të cilat jo vetëm që nuk ndalen, por rriten nga viti në vit. Një milionë shqiptarë në emigrim është dëshmia më tronditëse të kostove të rënda të keq qeverisjes dhe të mënyrës se si Edi Rama është sjellë me shqiptarët si armiku më i egër i tyre. Sot jemi vendi, jo vetëm kampion sa i përket korrupsionit, jo vetëm vendi i dytë në botë për ryshfetin pas Zambias, por edhe vendi ku edhe sipas Indeksit të drejtësisë renditemi pas Vietnamit Komunist, renditemi pas Bjellorusisë së Lukashenkos.
Jemi vendi më i varfër në kontinent, por që ka koston më të lartë të jetesës për qytetarët e tij. Sot në Shqipëri një pensionist, pra prindërit tuaj, gjyshërit tuaj, të afërmit tuaj i blejnë ushqimet e shportës më shtrenjtë se në Greqi, në një vend ku pensioni mesatar është 170 euro, pra 4.8 herë më i vogël se pensioni në Greqi, ku pensioni mesatar është diku te 870 euro, por ku pensionisti i blen ushqimet dhe ilaçet, paguan faturën e energjisë dhe të ujit shumë më shtrenjtë se në Greqi.
Përfshirë këtu edhe çmimin e naftës, ku e verifikova dhe pak çaste më parë, nafta është më e lirë në Greqi, ku paga mesatare është diku te 1479 euro, ndërkohë në Shqipëri, në vendin ku paga mesatare është rreth 770 euro, pra gati 2.2 herë më e ulët, paguajnë një çmim më të lartë të naftës.
Jemi vendi ku më shumë se gjysma e popullsisë jeton në varfëri absolute, në pamundësi jo për të shtyrë muajin, por për të shtyrë ditët dhe kjo kosto jetese rritet vit pas viti, ku edhe për shëndetësinë që u premtua që do të ishte falas, qytetarët e Republikës së Shqipërisë, paguajnë 60 deri 70% më shumë edhe më shtrenjtë se të gjithë vendet e tjera në rajon. Pra si ka mundësi që populli më i varfër në rajonin tonë ka këto kosto të çmendura, abuzive të çmimeve, e ka të pamundur të mbijetojë në Atdheun e tij, ku jo vetëm është rritur kostoja e lartë e jetesës, por ku në mënyrë progresive është rritur edhe dhuna shtetërore dhe ju jeni dëshmitarë të saj, se si këtë periudhë, Narkoqeveria e Edi Ramës ka bërë çdo presion ndaj të gjithë bashkatdhetarëve tanë në diasporë, jo vetëm në Greqi, po kudo ata ndodhen, duke i kërcënuar familjarët e tyre me bukën e gojës, me vendet e punës në rast se ata nuk ju detyrojnë ju me dhunë apo si pasojë e një kërcënimi, të votoni në 11 Maj një regjim i cili nuk ka bërë asgjë tjetër veçse ka rënë në përsëritje, ka varfëruar më tej dhe cdo vit të afërmit tuaj.
Sot në Shqipëri kemi një Qeveri, një Narkoqeveri, e cila për herë të parë në historinë e këtij kontinenti, themeloi një Narkoshtet. Jemi Shteti apo vendi ku për herë të parë në të gjithë Kontinentin Europian, një Kryeministër me lidhje të drejt për drejta dhe të faktuara këto edhe nga ish – krahu i tij i djathtë, me Organizatat Kriminale më të rrezikshme Ndërkombëtare, i cili pret në zyrë përfaqësuesit e Sinalohas, pret në zyrë përfaqësuesit e Ndraghetës, ka të afërm të tij të përfshirë drejt për drejt me trafikun Ndërkombëtar të drogës, një vend ku të paktën 3 Ministra janë shkarkuar për lidhje të drejt për drejta dhe si drejtues të trafikut, vet ata apo familjarë të tyre, të trafikut Ndërkombëtar të drogës.
Jemi vendi ku Drejtori i Policisë edhe ky aktuali, celularët e të cilit janë të sekuestruara në SPAK, pikërisht sepse është i hetuar për lidhjet e tij me bandit dhe me Krimin e Organizuar. Ku shefat e komisariateve nuk e kanë fokusin në garantimin e rendit dhe sigurisë publike, port e garantimi i tregtisë së drogës dhe ku për fat të keq e gjithë Shqipëria, në vend të shndërrohej në një tokë mundësish për ju, për të afërmit tuaj, për fëmijët tuaj, u shndërrua në një parcelë Kanabisi. Ne vijmë para jush me një program konkret, plotësisht të realizueshëm, të certifikuar dhe plotësisht të financueshëm, 5 prioritete për 4 milionë shqiptarë plus.
Një program i cili jo vetëm i jep fund dramës së madhe të shpopullimit, por edhe e shndërron Shqipërinë në një fuqi prodhuese dhe eksportuese në rajon. Me të drejtë ju do pyesni ku do i gjeni paratë për të realizuar këtë program?
Sipas vetë Institucioneve të Qeverisë, janë rreth 3 miliardë euro në vit që vidhen nga Edi Rama dhe që përfundojnë në xhepat e tij, të Ministrave dhe të drejtorëve hajdutë të “Rilindjes”. Në 4 vjet janë rreth 12 miliardë euro, plotësisht të mjaftueshme për të ndryshuar të ardhmen e Shqipërisë, të ardhmen e familjarëve tuaj që jetojnë në Atdheun tonë të përbashkët.
Nëpërmjet këtij programi me 5 prioritete me 5 shtylla bazë, ne angazhohemi, së pari për të ndalur dramën e madhe të shpopullimit dhe për këtë programi ynë synon mbështetjen dhe pagesa direkte dhe me mbështetje konkrete të çifteve të reja, të cilat sot e kanë të pamundur të blejnë një apartament në Tiranë, ku çmimet e kanë bërë të papërballueshme blerjen e një apartamenti, në rastin e një çifti të ri do t’i duhen 60 deri në 70 vite jetë për të blerë një apartament në periferi të Tiranës.
Po çfarë ofrojmë ne?
Ne ofrojmë shtëpi sipas modelit hungarez, një model i cili ka rezultuar i suksesshëm dhe një mbështetje konkrete për çiftet dhe për familjet e reja. Ne angazhohemi të paguajmë pagat për nënat deri në 2 vite pas lindjes në masën 100%. Ne angazhohemi të japim kredi për çiftet e reja, duke ofruar zbritje të kredisë për ta, 3 mijë euro për fëmijën e parë, 6 mijë euro për fëmijën e dytë, 10 mijë euro për fëmijën e tretë e kështu në mënyrë progresive. Si dhe do të japim 20 mijë euro grand për çdo të ri deri në 29 vjeç, i cili ka ambicie dhe synon të hapi një biznes ose start-up. Shtylla e dytë e programit tonë është dyfishimi i pagave dhe pensioneve.
Sepse sot me këtë nivel pagash dhe pensionesh, më shumë se gjysma e popullsisë në vendin tonë, në Atdheun tonë jetojnë në varfëri absolute dhe mjafton t’ju sjell një shembull që u bë publik së fundmi nga ish – krahu i djathtë i Edi Ramës, Arben Ahmetaj, vetëm një shishe verë që Edi Rama konsumon në ditë është e barabartë me 14 vite pension minimal, vetëm një shishe verë, pa llogaritur aferat e tjera të çmendura sikundër është afera e inceneratorit apo inceneratorëve që nuk ekzistojnë, 500 milionë euro.
Sikundër janë aferat e PPP- ve, koncesioneve, tenderave sekretë, rrugët e florinjta.
E dëgjuat besoj Arben Ahmetajn, 50 milionë euro bakshishi vetëm për tunelin e Llogarasë, kur ndërkohë kjo Qeveri jep 44 milionë euro vetëm për fermerin shqiptar dhe gllabëron vetëm me një aferë 50 milionë euro.
Ndaj ne angazhohemi për të dyfishuar pagat dhe pensionet si dhe për të garantuar me ligj pagën e 13- të për çdo punonjës të administratës, si dhe pension të garantuar me ligj, të 13- të për çdo pensionist, në mënyrë që të mos kemi më pensione mizerabël në vlerën 170 euro, pensione të cilat nuk dalin as për të shtyrë javën me ushqim dhe jo më për të paguar faturat e kripura të energjisë elektrike apo të ujit të pijshëm.
Shtylla e tretë e programit tonë është Investimi në Arsim, sepse për ne arsimi jo vetëm është kryeprioritet Kombëtar, por ne mendojmë se duke investuar në arsim do të frenojmë dhe do të ndalojmë dramën e madhe të shpopullimit të Shqipërisë nga të rinjtë dhe të rejat dhe nga forca më krijuese e vendit.
Për këtë ne angazhohemi të financojmë arsimin me 1.3 miliardë euro si dhe të mbështesim inovacionin, kërkimin shkencor në mesataren e Bashkimit Europian, të ndërtojmë çerdhe dhe shkolla të reja në mënyrë që të mos kemi më ato drama sociale që ndodhin në Tiranë, ku për shkak të një takes të fshehur siç është taksa e infrastrukturës arsimore, janë grumbulluar rreth 50 milionë euro gjoja për të ndërtuar shkolla, por shkolla të cilat nuk u ndërtuan kurrë.
Dhe ne mendojmë që të tilla taksa antikushtetuese, jo vetëm duhen të shfuqizohen, por nuk është nevoja që të taksosh pafundësisht qytetarët më të varfër të kontinentit kur ndërkohë i ke të gjitha mundësitë, nëpërmjet ndërprerjes së abuzimit dhe të korrupsionit me fondet publike, që jo vetëm të ndërtosh shkolla, çerdhe e kopshte të reja, por edhe të mbështetësh financiarisht me 100 euro për fëmijë këdo familje që çon fëmijën e tij në çerdhe apo kopsht privat.
Një tjetër shtyllë e rëndësishme e këtij programi është mbështetja konkrete me pagesa direkte e bujqësisë dhe e fermerit shqiptar, i cili sot ndodhet përditë, kush i ndjek lajmet nga Shqipëria, i sheh përditë tokat dierr, sheh çdo ditë lajme se si fermeri shqiptar hedh prodhimet në kanal, se si sharron drurët frutorë, apo se si braktis bizneset për shkak se kjo Qeveri, armike e fermerit shqiptar, jo vetëm nuk i mbështet ata me subvencione, por edhe fondet që BE jep për të mbështetur bujqësinë, sikundër kanë qenë fondet e IPARD- it, përfundojnë tek inceneratori që nuk ekziston. Ne do të subvencionojmë dhe do të japim pagesa direkte për çdo kokë dele, për çdo kokë dhi dhe lopë si dhe do të paguajmë për çdo hektarë pemishte apo sera në mënyrë që mundi, gjaku, djersa e fermerit shqiptar të mos përfundojë në kanal, por mirëqenia e fermerit të rritet, të ardhurat e familjes së tij të rriten dhe ekonomia shqiptare të fuqizohet.
Dhe pika apo shtylla e pestë e programit tonë është: Shqipëria Fuqi Eksportuese. Vendi me pasuritë më të mëdha natyrore në rajon, me një vijë të jashtëzakonshme bregdetare, sot eksporton, për shkak të politikave anti qytetare, anti sociale të kësaj Qeveri, vetëm 8% të PBB, kur Maqedonia e Veriut fqinje, se nuk po krahasohemi me Greqinë se nuk mund të krahasohemi me Greqinë që është vend i BE, por po i referohem Maqedonisë së Veriut që eksporton 57% të PBB dhe ka si fokus kryesor të reklamës së saj për thithjen e investimeve të huaja, faktin se ndodhet vetëm 200 km në vijë ajrore nga porti i Durrësit.
Shqipëria që e ka portin e Durrësit aty, eksporton vetëm 8% të PBB, pra praktikisht nuk eksporton asgjë përveç faktit se eksportojmë drogë me lishencë qeveritare.
Por ne mendojmë se duke e shndërruar Shqipërinë në fuqi prodhuese dhe eksportuese në rajon, të paktën sa Maqedonia, të mund të ndihmojmë të gjithë ata shqiptarë të ndershëm dhe patriot, të ndihmojmë prodhimet vendase, prodhimet “ Made in Albania”, të cilat sot janë asgjësuar nga projektet anti kombëtare të Edi Ramës, sikundër ishte mbështetja që ai i dha “ Ballkanit të Hapur” që e përmbyti Shqipërinë me prodhimet e Serbisë, e përmbyti me qumështin pluhur nga Serbia, kur ndërkohë fermerët që rritin lopët e kishin të pamunduar të shisnin qumështin apo bulmetin e tyre.
Ndaj ju ftoj të gjithëve që në 11 Maj të ndëshkoni me votë atë që ju detyroi jo vetëm të largoheni nga vendi, por edhe që ju ka mbyllur të gjitha dyert dhe të gjitha mundësitë për tu rikthyer në Atdheun tuaj.
Ju ftoj të gjithëve, këto ditë të mbetura deri në 4 Mars, të regjistroheni për të votuar, sepse kjo është një mundësi historike për të cilën Partia e Lirisë ka qenë e para që e ka ngritur si nevojë dhe si domosdoshmëri, pra votën e Diasporës, por edhe si një shans që i jepet sot cdo shqiptari për t’u shprehur me votë dhe për të ndëshkuar me votë atë që dëboi nga Shqipëria mbi 1 milionë shqiptarë. Atë që ju ndau nga familja, atë që ju zhvlerësoi me 50% remitancat, atë që varfëroi prindërit tuaj, atë që i ka lënë në mizerabilitet gjyshërit dhe pensionistët shqiptarë.
Ne kemi edhe një program po me 5 shtylla kryesore për Diasporën: Së pari, më Partinë e Lirisë, në 12 Maj dhe me Ilir Metën në Qeveri, ne do të krijojmë një Ministri të posaçme për Diasporën, jo për të organizuar evente, por një Ministri e cila do të ketë fokusin e saj kryesor pikërisht riintegrimin e bashkatdhetarëve tanë në Shqipëri.
Gjithashtu ne angazhohemi për përjashtimin për 10 vite nga tatim-fitimi për çdo investim që shqiptarët në Diasporë do të bëjnë në Shqipëri.
Angazhohemi gjithashtu për të përjashtuar për 10 vite cdo shqiptar në Diasporë që vendos të rikthehet në Shqipëri dhe uroj që një nga këta të jetë edhe Aleksandri, do të përjashtohen për 10 vite nga taksat lokale.
Tjetër angazhim i yni është dhënia e tokës shtetërore me 1 euro për të gjithë ata shqiptarë në diasporë që kanë një projekt zhvillimor në vendin tonë.
Si dhe gjithashtu ne marrim përsipër, pra Shteti do të marri përsipër që kostot lokale të TVSH- së për pajisjet për investime që shqiptarët në diasporë do të sjellin në vend do të mbulohen të gjitha nga Shteti. Pra kjo tregon edhe një herë faktin se Partia e Lirisë nuk bën propagandë me diasporën, por ka edhe një program konkret dhe për ju dhe për të gjithë bashkatdhetarët tanë jo vetëm në Greqi, por kudo në botë.
Ndaj thirrja ime është, në këto ditë të mbetura të takojmë çdo bashkatdhetarë tonin, të trokasim në cdo zemër shqiptari në Athinë e kudo tjetër në Greqi por jo vetëm, në mënyrë që të mos e humbasim këtë mundësi historike që ju është dhënë për të qenë ju vendim marrës se kush e meriton dhe duhet në fakt ta drejtojë Shqipërinë ne 11 Maj dhe që sigurisht nuk mund të jetë armiku më i madh i lirive dhe të drejtave tuaja që është Edi Rama. Por jam i bindur se vota e bashkëatdhetarëve tanë në Athinë, vota e bashkëatdhetarëve tanë në të gjithë Greqinë dhe kudo në Diasporë, do të shkojë për ndryshimin, do të shkojë për Ilir Metën, për Partinë e Lirisë dhe për Opozitën e bashkuar.
Faleminderit të gjithëve!
