“Opozita ka terren të sigurt për të fituar zgjedhjet. Protestat janë në prag. Ne do të kërkojmë qeveri teknike si garanci për të krijuar kushte për zgjedhje të lira e të barabarta, por në çdo rast ne do ta mundim.
Duhet të bëjmë thirrje për çdo qytetar që është jashtë Shqipërisë të regjistrohet. Detyra jonë është të bindim qytetarët që ne jemi alternativa e duhur, të bindim strukturat dhe veten për ta mundur në çdo rrethanë Ramën.
700 mijë qytetarët që janë larguar në 10 vite, nuk besoj që janë larguar nga kënaqësia e kësaj qeverisjeje, por për shkak të pakënaqësive; sistemi arsimor, shëndetësor, pabarazia dhe mungesë merite, përballja me strukturat e kriminalizuara të shtetit. Vota e emigrantëve është në shumicën dërrmuese e opozitës”, tha deputeti demokrat.
Salianji shtoi se protestat do të jenë masive, edhe pse në fakt qytetarët kanë treguar se nuk mbështesin më Sali Berishën dhe grupimin e tij, kjo është vënë re dhe në protestat e fundit, ku PD nuk ka mbledhur dot as një grusht mbështetësish.
“Unë mendoj që protestat që do të vijnë, do të jenë masive, të cilat për formën e tyre do ketë komunikime nga strukturat e larta të PD. Në momentin duhur do të viheni në dijeni, jemi duke u përgatitur që gjithë pakënaqësinë e mllefin që qytetarët kanë ndaj keqqeverisjes ta kapitalizojmë në zgjedhje dhe të bëjmë gjithçka për të rrëzuar qeverinë”.
I pyetur për rrjedhjen e votës opozitare pas krijimit të grupimit të ri opozitar dy ditë më parë, në A2 Salianji solli në vëmendje Ramën kur ishte në opozitë në vitin 2013, teksa sulmoi Dashamir Shehin se merr për vota qyl nga PD.
“Partitë politike kanë ndryshime, kanë e ambicie. Opozitën nuk e dëmton kjo gjë. E dëmton nëse nuk ka program apo është apatike, nuk ka ekip, apo nuk lëviz. Nuk e shoh këtë te PD. Në 2013 kur ishte në opozitë Rama, kishte 6 parti të krijuara nga ish-ministra apo funksionarë të lartë të PS.
Në zgjedhjet e kaluara ishte ky debat. Por ne duhet të bëjmë gjithçka për bashkimin ku është e domosdoshme dhe kur janë opozitë si ne. Por ata që kanë shkuar me qeverinë vetë diskreditohen dhe votat e tyre do shkojnë tek opozita. Nuk di të ketë krijuar parti zoti Alibeaj, kurse zotëria tjetër (Shehi) nuk merr asnjëherë vota, merr vota qyl nga PD dhe bën sikur ka përfaqësim. Janë lëvizje që nuk e kuptoj qëllimin”.
