Ervin Karanxha rikthen dosjen e famshme të aferës me rrugën Durrës-Kukës…
Prokurori Ervin Karanxha ka bërë një deklaratë të fortë mbrëmjen e sotme. Ai ishte në podkastin “Të Pashoq” në kanalin e Pamfletit në YouTube, për të folur mbi drejtësinë dhe hetimet ndaj politikës.
Ai tregoi se në vitin 2007 nisi hetimet për aferën me rrugën Durrës-Kukës dhe më pas dosja kaloi te Prokuroria e Përgjithshme, e cila në atë kohë drejtohej nga Ina Rama. Sipas Karanxhës, kjo dosje u gropos për shkak të kryeprokurores së kohës, e cila e nxori jashtë afatit.
“Unë kam pasur në dorë dosjen e rrugës Durrës-Kukës në vitin 2007. Procedimi i çështjeve atëherë ka qenë i tillë, që nëse konstatohej një ministër apo zyrtar i lartë, kanë pasur juridiksion fillestar Prokurorinë e Përgjithshme. Lulzim Basha që ishte ministër i Transportit, e kemi çuar për kompetencë te Prokuroria e Përgjithshme, si rang ministri. Për kohë atëhere ishte shumë e madhe. Fatkeqësisht kjo dosje u shkatërrua, apo u nxor jashtë afatit nga ish-Prokurorja e Përgjithshme Ina Rama dhe u pushua çështja. Është fakt, po ta kërkosh dhe në internet. Është vendimi i Gjykatës së Lartë se Prokuroria e Përgjithshme e nxori jashtë afatit dosjen”, tha ai.
Sipas raportit të KLSH, në rrugën Durrës-Kukës u vodhën 230 milionë euro. Në atë kohë Kontrolli i Lartë i Shtetit theksonte se vjedhja e parave është bërë me fatura fiktive, me rritje të kostove vetëm në letër, me tatimin mbi të ardhurat, me pagesa për punë të pakryera. Sipas dosjes dhe raportit të KLSH që në fillim të këtij projekti, janë vënë në dukje shkeljet, por gjithçka kaloi në qeveri ku vendosi Berisha politikisht.
Ndërkaq, kontrata e përpiluar dhe më pas e nënshkruar me përfaqësuesit e shoqërisë “Bechtel & Enka” është bërë në bazë të ligjeve angleze dhe jo atyre shqiptare.
Në 10 prill 2009, Gjykata e Lartë pushoi çështjen në ngarkim të Lulzim Bashës, duke rrëzuar si të pavlefshme dosjen e Prokurorisë së Përgjithshme, pasi prokuroria kishte kryer veprime përtej afatit dhe në kushtet kur gjykatat kishin rrëzuar kërkesën e prokurorit për zgjatjen e hetimeve me një muaj. Konkretisht, prokuroria i kishte dërguar jashtë afatit dosjen hetimore Lulzim Bashës për t’u njohur më të. /Pamfleti
