Sekretari i përgjithshëm i NATO-s, Mark Rutte ka zhvilluar dy biseda telefonike me presidentin Zelensky pas dështimit të takimit me Donald Trump, ku i ka sugjeruar liderit ukrainas që të riparojë sa më parë marrëdhëniet me presidentin amerikan.
“Mendoj se duhet të gjesh një mënyrë se si të rregullosh marrëdhëniet e tua me Donald Trump dhe gjithë administratën amerikane”, i ka rekomanduar Rutte-Zelenskyt.
Në një intervistë për BBC, shefi i Aleancës ka thënë se i ka përcjellë Kievit një mesazh të qartë. “Ne duhet të qëndrojmë bashkë, Shtetet e Bashkuara, Ukraina dhe Evropa, për t’i sjellë vendit një paqe afatgjatë”, ka thënë Rutte.
Ai ka shprehur bindjen se presidenti Trump është i angazhuar për t’i sjellë një paqe të qëndrueshme Ukrainës.
Vetë Rutte është takuar disa herë me Donald Trump para marrjes së detyrës. Ai ka theksuar se bashkëpunimi SHBA-BE është jetik në aspektin e sigurisë dhe u ka këshilluar vendeve anëtare të NATO-s që të rrisin shpenzimet ushtarake përtej kuotës prej 2 për qind.
Kërkesa e fundit e Trump drejtuar Evropës ka qenë që shpenzimet në fjalë të arrijnë deri në 5 për qind të GDP-së, nivel që është konsideruar si shumë i lartë nga disa vende të Unionit, përfshirë Gjermaninë.
