Kryetari i Partisë Republikane, Fatmir Mediu tha se partitë e vogla që do të futen vetëm në zgjedhje apo pa koalicion me partitë e mëdha, dhe në fund përfundojnë pa mandate, atëherë nuk do të bënin gjë tjetër veçse t’i shërbenin Edi Ramës.
I ftuar në studion e “Now të Erla Mëhillit”, Mediu shtoi se duhet të jenë në mazhorancë për të ndryshuar Shqipërinë.
“Që të ndryshosh Shqipërinë duhet të marrësh mazhorancën, për këtë duhet një koalicion sa më i organizuar dhe i gjerë. Nëse i kishim 26 subjektet më vete do merrnin një numër të caktuar votash por që nuk do përktheheshin në mandate.
Edhe subjektet e tjera që kanë dalë vetëm ose në koalicion, problemi më i madh i sistemit është se nëse ato vota nuk kthehen në mandate shkojnë në favor të Edi Ramës, se Rama në 2019 bëri ndryshimet e Kushtetutës me këtë qëllim që të mos lejonte koalicionet e përbëra, se atëherë do ishte ndryshe situata, do kishte konkurrime të përbashkët por secili subjekt do kishte mandatet e veta”, tha Mediu.
Kujtojmë se Partia Republikane e Fatmir Mediut është në një koalicion me Partinë Demokratike dhe me 24 parti të tjera, e në zgjedhje do të përfaqësohet me titullin “Partia Demokratike- Aleanca Për Shqipërinë Madhështore”.
