Koordinatori për programin ekonomik në PD Dorjan Teliti, deklaroi sot një nga angazhimet e Partisë Demokratike nëse fiton zgjedhjet.
Në një postim në facebook, Teliti thotë se PD në angazhimin e saj të 100 ditëve të para te qeverisjes, do të ofrojë rimbursim real dhe në kohë të TVSH-së për sipërmarrjen dhe prodhuesit shqiptarë.
Rimbursim automatik të TVSH-së çdo muaj për bizneset prodhuese që eksportojnë, duke e kompensuar me detyrimet tatimore të periudhës korente dhe heqjen e kontrolleve të shpeshta dhe burokratike me vetëm një kontroll vjetor sipas riskut të sistemit, janë 2 prej masave që do të marrë PD në 100 ditët e para të saj në qeverisje, pas zgjedhjeve parlamentare të 11 majit.
STATUSI I PLOTË I TELITIT
RIMBURSIM REAL DHE NË KOHË TË TVSH-së – ANGAZHIM I 100 DITËVE TË PARA TË QEVERISJES SË PD-së!
Pa prodhim, nuk ka ekonomi. Pa prodhim, nuk ka mirëqenie.
Biznesi duhet mbështetur me politika të qarta, procedura të reduktuara dhe transparente. Por mbi të gjitha, duhet t’i jepet fund diskrecionit ministror në rimbursimin e TVSH-së!
PD angazhohet për:
Rimbursim automatik të TVSH-së çdo muaj për bizneset prodhuese që eksportojnë, duke e kompensuar me detyrimet tatimore të periudhës korente.
Heqjen e kontrolleve të shpeshta dhe burokratike – vetëm një kontroll vjetor sipas riskut të sistemit.
Ekonomia nuk zhvillohet me propagandë, por me vizion, guxim dhe politika të duhura ekonomike.
Shqipëria ka nevojë për një qeveri që mbron biznesin prodhues dhe krijon kushte reale për zhvillim!
