Kryetari i Nisma Thurje, Endri Shabani duke folur për zgjedhjet e 1 majit deklaroi sot se ky subjekt kërkon të përfaqësojë shtresën e mesme në parlament. Shabani konfirmoi se ai vetë do të kandidojë në Tiranë. Ai shtoi se në listën e Nisma Thurje do të ketë njerëz me integritet.
“Ne duam të përfaqësojmë shtresën e mesme në parlament. Unë do të kandidoj në Tiranë. Kam jetuar në Tiranë dhe ndaj do kandidoj në kryeqytet. Do e dorëzojmë listën për pak kohë. Ata që do jenë në listën tonë duhet të kenë figurë të pastër. Ne duam të fuqizojmë shtresën e mesme në Shqipëri. Në Shqipëri nuk ka të majtë e të djathtë, por janë njerëz që hyjnë në politikë me synimin për të vjedhur. Këta kanë vjedhur se janë hajdutë. Në listën tonë do ketë të rinj me integritet. Ne na duhet një treg të lirë, shteti duhet të jetë solidar, prona të ruhet, një çift i ri ta ketë mundësinë që ta blejë një banesë”, tha ai.
Më tej, Shabani shtoi se tranzicionit i ka ardhur fundi e se në parlament duhet të ketë të rinj me integritet.
“Ne duam që të depolitizojmë administratën publike. Janë të njëjtët njerëz që kanë 20 vjet që mbajnë pozicione të larta, ne duam që kjo të marrë fund. Ne duam të mos ketë më oligarki në treg, por që tregu të jetë i lirë. Ne duam të fuqizojmë SPAK dhe GJKKO. SPAK duhet të ketë duart e lira, që të merret me çështje të rëndësishme. Ne duam të fuqizojmë KLSH. Duhet të zgjidhim problemet e pronave në Shqipëri. Ne duam që të përmirësojmë shërbimet publike. Ne duam t’i japim prioritet brezit të ri, që ta zhvillojnë jetën e tyre në Shqipëri. Tranzicionit i ka ardhur fundi, gjërat po ndryshojnë. Nëse çojmë të rinj në parlament, mund të shpresojmë se gjërat janë duke u rregulluar në vend”, deklaroi Shabani.
