Presidenti amerikan, Donald Trump, duket i pa shqetësuar për luftën tregtare me Kinën, Kanadanë dhe Meksikën.
Duke folur nga aeroplani zyrtar “Air Force One” në lidhje me taksat që vendi i tij ka kërcënuar se do t’ua vendosë këtyre shteteve dhe masat e paralajmëruara hakmarrëse të tyre kundër ShBA-së, Trumpi tha: “E gjitha që di është kjo: ne do të marrim qindra miliarda dollarë nga taksat dhe ne do të bëhemi aq të pasur, saqë ju nuk do të dini se ku t’i shpenzoni të gjitha ato para, po ju them, vetëm shikoni.”
“Do të kemi vende pune, do të kemi fabrika të hapura, do të jetë për mrekulli” – shtoi ai, duke u mbajtur për një çast me të dyja duart për aeroplani për shkak të luhatjes gjatë fluturimit.
Shtetet e Bashkuara kanë kërcënuar me vendosjen e taksave të larta ndaj Kanadasë, Meksikës dhe Kinës, ekonomisë së dytë më të madhe në botë.
Pak ditë më parë, presidenti Donald Trump shtyu hyrjen në fuqi të tarifave mbi një sërë mallrash nga Kanadaja dhe Meksika.
Pas një bisede telefonike me presidenten e Meksikës, Claudia Sheinbaum, Trump deklaroi se “Meksikës nuk do t’i kërkohet të paguajë taksa për asgjë” që bie brenda marrëveshjes tregtare mes SHBA-së, Kanadasë dhe Meksikës, e njohur si USMCA.
Në fakt, taksat nuk i paguajnë shtetet, por kompanitë importuese amerikane, të cilat blejnë produkte nga bizneset në vendet e prekura nga masat.
