Juristi Kreshnik Spahiu i ftuar në Report Tv, komenton seancën që do të mbahet nesër në Apelin e Posaçëm, ku kryebashkiaku i Tiranës, Erion Veliaj do të paraqitet për ankimin e masës së sigurisë arrest me burg. Spahiu thotë se gjyqtari që shqyrton ankimin, Engert Pëllumbi nuk është socialist, se ai ka dënuar me burg Saimir Tahirin.
Spahiu thekson se fati i Veliajt nuk është në dorën e SPAK, pasi është në detyrën e gjykatës të bëjë arbitrin mes prokurorisë dhe mbrojtjes ligjore.
“Engert Pëllumbi nuk është socialist, se ai ka dënuar me burg Saimir Tahirin, pra në periudhën kur ish-ministri i PS ishte një nga figurat më të forta dhe personaliteti i parë politik që shkonte në burg dhe të dënohej nga një gjykatë. Për ata që kanë dyshime për Pëllumbin, do i thoja që këtij djaloshi që e kam njohur duhet t’i besohet më shumë. Fati i Veliajt nuk është në dorën e SPAK. SPAK është një organ i suksesshëm që duhet vlerësuar për punën që ka, në të drejtën e tyre të kërkojnë çfarëdo lloj mase shtrënguese. Por, është në detyrën e gjykatës të bëjë arbitrin mes prokurorisë dhe mbrojtjes ligjore.
A është aq i rrezikshëm Veliaj sa të shantazhojë dëshmitarët, të shkatërrojë provat, Veliaj në arrest shtëpiak me një polic në derë, a e pengon hetimin apo jo. Veliaj nuk është arrestuar në flagrancë, janë vepra penale që janë kryer në të shkuarën. Janë prova që janë siguruar nëpërmjet sistemit bankar dhe elektronik. Si mund t’i prishë këto transaksione bankare. Gjykimi për Veliaj do bëhet kur dosja të kalojë për Gjykim, ky është proces që do marrë të paktën 2 vjet. Nuk jemi këtu për të gjykuar se ça do bëhet për dosjen e 2027, pro ca do bëhet për masën e sigurimit. Shqipëria ka rekord të paraburgimit. Është afro 197 arreste për 100 mijë banorë. Jemi një nga vendet me rekordin negativ të pafajësive. Vetëm në Rusi dhe Shqipëri 2% e të pandehurve marrin pafajësi”, tha Spahiu.
