Presidenti Donald Trump sapo ka ndarë lajmin në rrjetet sociale se do të rrisë tarifën për të gjithë çelikun dhe aluminin që vjen në SHBA nga Kanadaja në 50%. Një tarifë prej 25% ishte planifikuar të zbatohej të mërkurën, por ajo do të rritet në 50%.
Postimi i Trump në Truth Social thotë: “Bazuar në vendimin e Ontarios, Kanada, për të vendosur një tarifë prej 25% mbi ‘Energjinë Elektrike’ që hyn në Shtetet e Bashkuara, kam udhëzuar Sekretarin tim të Tregtisë të shtojë një tarifë SHTESË prej 25%.”
Dje, Kryeministri i Ontarios, Doug Ford, njoftoi një shtesë prej 25% mbi energjinë elektrike të destinuar për SHBA-në.
Rreth 1.5 milionë shtëpi dhe biznese amerikane në shtetet kufitare veriore si Nju Jorku, Miçigani dhe Minesota do të preken nga kjo masë.
“Tarifat e Presidentit Trump janë një katastrofë për ekonominë amerikane. Ato po e bëjnë jetën më të shtrenjtë për familjet dhe bizneset amerikane,” tha Ford në një deklaratë të hënën.
Gjatë konferencës për shtyp të së hënës, Ford kërcënoi me përshkallëzim të mëtejshëm nëse SHBA rrit tarifat ndaj Kanadasë.
“Nuk do të hezitoj ta rris këtë tarifë nëse është e nevojshme,” tha ai. “Nëse SHBA përshkallëzon, nuk do të hezitoj të ndal plotësisht furnizimin me energji elektrike”, shtoi ai.
