Presidenti rus, Vladimir Putin , ka pranuar propozimin e SHBA-ve për armëpushim 30-ditor në Ukrainë.
Në një konferencë për shtyp nga Moska, i pari i Kremlinit ka thënë se është pro armëpushimit.
“Ne jemi pro armëpushimit”, tha Putin.
Gjatë konferencës Vladimir Putin u pyet nëse mendon se Ukraina është gati për një armëpushim dhe nëse ai është informuar nga SHBA.
Lidhur me pyetjen, Putini fillimisht falënderoi presidentin Trump që sipas tij interesohet dhe i kushton vëmendje arritjes së një zgjidhjeje në Ukrainë.
Ai tha se Rusia pajtohet me propozimin për një armëpushim, por armëpushimi duhet të çojë në një “paqe të qëndrueshme”, u shpreh Putin.
“Ne pajtohemi me propozimin për ndërprerjen e armiqësive, por ai duhet të çojë në paqe të qëndrueshme dhe të heqë shkaqet themelore të kësaj krize,” theksoi presidenti rus.
Putin tha gjithashtu se është i bindur se Ukraina duhet t’i kishte kërkuar me këmbëngulje SHBA-ve një takim, si ai në Arabinë Saudite, duke pasur parasysh situatën në terren.
Presidenti rus foli gjithashtu për vizitën e tij në rajonin e Kurskut. Ai tha se situata atje është plotësisht nën kontrollin e Rusisë.
Presidenti shtoi ndër të tjera se kontrolli nga forcat ukrainase “ka humbur” në Kursk, duke thënë se pajisjet e tyre janë “braktisur”.
Si rrjedhojë sipas Putinit, “do të ishte mirë” që Ukraina të arrinte armëpushim 30-ditor, duke thënë se “ne jemi pro”.
Putini tha se është dakord që t’i jepet fund konfliktit me Ukrainën, por me mjete paqësore.
Ai u shpreh i hapur për të zhvilluar telefonatë me presidentin e SHBA-ve, Donald Trump për të diskutuar më shumë rreth propozimit.
