Analisti Denis Dyrnjaja duke folur në edicionin e lajmeve në MCN TV tha që kemi një përplasje të hapur mes kryebashkiakut në hetim Erion Veliaj dhe kryeministrit Edi Rama.
Dyrnjaja vuri në dukje se sot “Veliaj është një minë me sahat pa siguresë” dhe mund të kthehet në planprishësin e Ramës.
Sipas analistit, Veliaj po jep sinjale shumë të forta, duke nënkuptuar se nuk ka më çfarë humbet, dhe nuk përjashtohet mundësia që të kthehet edhe në të penduar të drejtësisë.
“Besoj që jemi përballë dy panoramave, panorama ligjore që është autonomia vendore, dhe ndodhemi përballë një vendimi tjetër, që gati gati ha interpretim, vendimi i SPAK që lejon kryebashkiakun të takojë familjarë dhe bashkëpunëtorë të bashkisë. Në këtë pikën e dytë, kryebashkiaku ende në detyrë i Tiranës merr vendime për të autorizuar drejtimin e bashkisë. Nga krahu tjetër ka një rregullim ligjor të funksionimit të bashkisë, ku këshilli bashkiak në raste specifike merr vendim për autorizimin e përkohshëm të njërit prej nënkryetarëve që të marrë drejtimin e bashkisë.
Jemi përballë faktit të kryer që z.Rama ka autorizuar znj.Ristani që të drejtojë bashkinë e Tiranës, në vendin e z.Veliaj. Këtu po bëhet një përballje politike, s’jemi më përballë faktit kush ka kompetencën ligjore. Kemi një përplasje të hapur mes kryetarit të bashkisë në hetim, dhe kryeministrit që po vepron nga pikëpamja politike dhe administrative, e detyruar edhe nga nevoja elektorale.
Rama ka interesin e zgjedhjeve dhe s’ka kohë të merret me tekat e kryabshkiakut nga qelia e burgut, që kërkon të tregojë ende autoritetin e pa humbur edhe pse ndodhet në qeli. Rama është totalisht në ajër në raport me ligjin, sepse është i pambështetur ligjërisht në vendimmarrjen e tij. Rama mendon që është i gjithëpushtetshëm.
Kjo përplasje është një prishje pune. Unë s’jam në trurin e Veliajt, por mendoj që atë që s’kanë bërë gjithë bashkëpunëtorët e Ramës deri më sot, që e kanë përkthyer në heshtje gjithë koston që kanë marrë, përveç Ahmetajt që ka folur nga ‘migrimi politik’, mendoj që planprishësi i Ramës do jetë Veliaj.
Nga mënyra si po sillet Veliaj, nuhatja më thotë, që ‘unë jam tani këtu dhe s’më bëhet vonë për Ramën dhe as për njeri, le të shkatërrohet çdo gjë, por nuk mund të rri këtu’. Kështu e përkthej sfidën që Veliaj i ka bërë Ramës. Tanimë kemi një përplasje ‘de facto’ të kryeministrit me kryetarin e bashkisë, kjo do jetë ndarja finale mes tyre.
Rrugët janë ndarë. Kryeministri po mbron haptas kreun e SPAK-ut, duke i shprehur respektin nominal me emër, ndërkohë që ka kryebashkiakun në përballe me Dumanin dhe me Ols Dadon. Rama është larguar shumë nga fillimi i çështjes ndaj Veliajt, ku mbronte haptas kryebashkiakun, dhe tani jemi në faktin ku të dy po përplasen për vendimmarrjet.
Fijet mediatike që mbrojnë Veliajn po heshtin. Kjo heshtje e fileve kryesore mediatike, mediave të shkruara dhe audiovizive, janë në një ngërç total, sepse i bie t’i shpallin luftë Ramës. Nuk dinë kujt t’i mbajnë krahun. Të hysh në betejë me Ramën për të mbrojtur Veliajn është risk i madh, prandaj kanë zgjedhur heshtjen. Veliaj është Kali i Trojës, apo një minë me sahat pa sigurisë. Po shohim një sfidë të hapur dhe një sinjal shumë të fortë, që unë s’kam ça humb pas kësaj përballje”, tha ai.
Dyrnjaja vë në dukje se “po rëndohet pozita ligjore e Veliajt”, ndërsa shton se ai mund të bëhet “një i penduar i drejtësisë dhe mund të hapë karta të rëndësishme”.
