Ambasada e Austrisë në Tiranë, ka shprehur mbështetjen ndaj SPAK-ut si dhe ka nënvizuar rëndësinë e pavarësisë së institucioneve të reja të drejtësisë, në ndjekjen dhe gjykimin e korrupsionit në nivele të larta.
Përmes një mesazhi, Ambasada austriake në Tiranë shprehet se zbatimi i reformës në drejtësi është themelor për rrugën e vendit drejt Bashkimit Europian.
Mesazhi:
Pak muaj më parë u hap rruga për negociatat gjithëpërfshirëse të anëtarësimit të Shqipërisë në BE. Austria është qartazi e përkushtuar ndaj perspektivës së Shqipërisë në BE dhe po mbështet, ndër të tjera, zbatimin e reformës në drejtësi. Kështu, ambasadoret dhe ambasadorët austriakë të rajonit të Ballkanit Perëndimor shkëmbyen ide edhe me përfaqësues të Strukturës së Posaçme për Luftën Kundër Korrupsionit dhe Krimit të Organizuar (SPAK), gjatë konferencës së tyre në Tiranë.
Pavarësia e SPAK-ut në hetimin, ndjekjen dhe gjykimin e rasteve të korrupsionit të nivelit të lartë dhe krimit të organizuar është thelbësore për forcimin e shtetit të së drejtës në Shqipëri.
