Kryeministri Edi Rama deklaron se me hyrjen e vendit në Bashkimin Evropian, çmimi i pronave në Shqipëri do të dyfishohet.
“Në momentin që ne do të hyjmë në BE, të gjitha pronat do të dyfishohen në çmim,” u shpreh Rama.
Gjatë një takimi me sipërmarrës të rinj në Sarandë, kreu i qeverisë theksoi se anëtarësimi në BE do të sjellë një hapje të madhe drejt tregut të përbashkët evropian, duke ndikuar drejtpërdrejt në rritjen e vlerës së pronave të patundshme.
“Siç ka treguar historia e vendeve që kanë hyrë para nesh. Në Kroaci, një muaj pas anëtarësimit, gjithçka kërceu dyfish. Sepse prona e patundshme bëhet objekt interesi për një popullatë prej qindra milionë njerëzish,” shtoi ai.
Rama nënvizoi gjithashtu rëndësinë që sektori i turizmit të mos mbetet i përqendruar vetëm në muajt e verës, por të zgjerohet me oferta të qëndrueshme gjatë gjithë vitit.
“Besoj se ka ardhur momenti të mendohet në mënyrë më të thelluar. Ju takon juve të mendoni për shtrirjen e bizneseve tuaja turistike dhe hoteliere edhe në territoret e brendshme, në zonat e Delvinës, Finiqit dhe Konispolit, të cilat kanë potencial të jashtëzakonshëm për agroturizëm dhe struktura hoteliere dimërore, për shëndetin, relaksin dhe të gjitha ato shërbime që kërkojnë natyrë të qetë, ambiente të pastra dhe atë oxhakun me zjarr që paguhet mirë.”
Pas takimit me të rinjtë në Sarandë, Kryeministri reagoi dhe mbi rritjen e vlerësimit mbi Shqipërinë në raportin ekonomik të “Standard & Poor’s”, duke e cilësuar atë si një tregues të progresit të Shqipërisë.
“Në raportin e saj më të fundit, agjencia prestigjioze ndërkombëtare e vlerësimit, “Standard & Poor’s Global Ratings”, pikë referimi e palëvizshme për tregjet financiare, investitorët dhe vlerësuesit e shteteve, ka përmirësuar përsëri vlerësimin afatgjatë të kreditit të Shqipërisë në “të qëndrueshme” (në “BB” nga “BB-“) duke e ngritur më tej vendin tonë në një nivel të ri, e duke konfirmuar edhe nga ky këndvështrim progresin e pandalur të Shqipërisë.
*E di që ata që ankohen për 2 minuta shaka me Lulin se duan program, nuk do e lexojnë këtë lajm”, shkruan Rama në facebook.
