Kryeministri Edi Rama, duke folur këtë të martë në rubrikën e tij në rrjete sociale, “Sy m’sy”, u shpreh se më 11 maj duhet të krijohet një bllok kompakt, përtej të majtës dhe të djathtës, përtej ndasive partiake, tifozllëkut dhe ndjekjes pas fanelave të partive.
Sipas tij ky bllok do të mundësojë integrimin e vendit në Bashkimin Evropian, duke e bërë PS-në në një farë mënyre si pikë referimi, ashtu siç ishte PD në vitet ’91-’92.
“Krijimi i vetëdijes që më 11 maj duhet të krijojmë një bllok kompakt përtej të majtës dhe të djathtës, përtej ndasive partiake, tifozllëkut dhe ndjekjes pas fanelave të partisë, është domosdoshmëri. Duhet ta krijojmë këtë vetëdije së bashku. PS, në numrin 5, është vendi për të hedhur votën, jo për t’u bërë të gjithë socialistë, por për të kompaktësuar mesazhin për BE dhe mbështetur fuqishëm negociatat, duke krijuar kushtet që edhe më 12 maj, kur të jemi duke numëruar votat dhe të tjerët të jenë duke u marrë me zgjedhjet, ata 1.000 vajza dhe djem të vazhdojnë të punojnë pa lëkundje nga impakti i votës. Në një farë mënyre, PS është në vendin dhe kohën e duhur si pika e referimit, siç ishte PD në ’91-92″, u shpreh Rama”.
Rama tha se me hyrjen në BE, vendi do të marrë 1 miliard euro fonde në vit.
“Në 10 vitet e fundit kemi marrë afro, diçka më shumë se 1 miliard euro. Çfarë kemi marrë në këto vite, do e marrim vit për vit. Krijimi i vetëdijes që më 11 maj, duhet të jemi përtej ndasive partiake, është një domosdoshmëri, duhet ta krijojmë këtë vetëdije së bashku. Rruga jonë e vetme është që më 11 maj të mos e lejojmë që të na shpëtojë treni i historisë”, tha Rama.
