Dëshmitë dhe disa raportime kanë ekspozuar pamjet e objekteve të paidentifikuara fluturuese (UFO) në të gjithë Amerikën mes vëmendjes kombëtare mbi vëzhgimet e dukshme të dronëve gjatë javëve të fundit.
Luiz Elizondo, ish-kreu i Programit të Avancuar të Identifikimit të Kërcënimeve të Hapësirës Ajrore në Departamentin e Mbrojtjes, dhe ekspertë të tjerë, dëshmuan para Kongresit muajin e kaluar për një grup të dyshuar qeveritar “që po fsheh faktin se ne nuk jemi vetëm në kozmos”.
“Unë besoj se ne si amerikanë mund ta përballojmë të vërtetën. Dhe gjithashtu besoj se bota e meriton të vërtetën,” tha Elizondo, duke i kërkuar Kongresit të miratojë legjislacionin që mbron sinjalizuesit, të cilët kanë shumë frikë të flasin publikisht.
Seanca ishte pjesë e një përpjekjeje më të madhe të ligjvënësve për të hetuar UFO-t, ose fenomenet ajrore të paidentifikuara (UAP) dhe për të përcaktuar nëse ka elementë brenda qeverisë që po fshehin në mënyrë të paligjshme provat nga Kongresi.
Ndërkohë, pamjet e UFO-ve janë raportuar në çdo shtet të SHBA-së, sipas Qendrës Kombëtare të Raportimit të UFO-ve, grupi më i madh i pavarur i raportimeve për UFO/UAP në internet.
Një vëzhgues i stërvitur ushtarak raportoi se ai ishte duke kampuar i vetëm në Kaliforni në tetor, kur papritmas të gjitha zhurmat natyrore u shuan dhe e gjithë zona “u ndriçua më shumë se hëna e plotë më e ndritshme që kishte parë ndonjëherë”.
Personi tha se pa një dritë ovale të ndritshme dhe të bardhë që ishte rreth 20 deri në 30 metra e gjatë dhe rrinte pezull, duke shtuar se drita mbeti plotësisht e palëvizshme dhe pa zhurmë, nuk lëshonte nxehtësi dhe i ngjante një helikopteri të madh.
Disa pilotë gjithashtu raportuan se kishin parë tre ose katër UFO në qiell mbi Oregon, duke fluturuar në lartësi të ndryshme, vetëm disa javë më parë.
Pilotët raportuan se kishin parë drita të çuditshme, rrethore të kuqe që rrotulloheshin gjatë natës, ndërsa një pilot i ‘United Airlines’ kontaktoi kullën e kontrollit për të folur për dritat lëvizëse që shiheshin mbi Oregonin perëndimor.
Në prill 2022, një dëshmitare tha se ajo vuri re një dritë në qiell mbi një rezervuar në Konektikat, duke besuar se ishte një fenomen ajror potencial i paidentifikuar (UAP/UFO).
“Unë jam gjithmonë një vëzhguese e qiellit, kështu që po pyesja veten nëse ishte një aeroplan,” tha gruaja. “Por mënyra se si po lëvizte, nuk ka mundësi të ishte një aeroplan.”
Ndërsa pamjet e fundit të dronëve ose avionëve misteriozë nuk janë saktësisht vëzhgime të UFO-ve, ato megjithatë kanë ngritur shqetësime dhe madje kanë tërhequr vëmendjen e FBI-së, duke ndezur diskutimet mbi mundësinë e objekteve të tjera fluturuese të paidentifikuara në qiell.
Javën e kaluar, Administrata Federale e Aviacionit lëshoi disa kufizime të përkohshme fluturimi, të cilat skadojnë më 17 janar 2025./FOX NEWS
