Kryetari i Partisë Demokratike, Sali Berisha, ka bërë një postim në rrjetin e tij social në Facebook, ku komenton ndërprerjen e energjisë elektrike këtë mbrëmje në disa qytete të vendit.
Berisha akuzon qeverinë për menaxhimin e keq të situatës, ndërsa thotë se ndonëse digat në vendin tonë janë plotë, qytetarët janë sërish pa energji elektrike, për shkak të vjedhjeve të qeverisë sipas tij.
“Shqipëria në terr! Qyteti i Vlorës, Fierit, Durrësit, Lushnjës dhe Sarandës në “blackout,” errësirë totale. Digat plotë! Shkaku?! Vjedhjet! Sb”, shkruan Berisha.
Disa qytete të vendit kanë mbetur pa enegji elektrike pasditen e kësaj të diele. Raportohet se rreth orës 17:40, Durrësi, Vlora, Fieri, Lushnja, Saranda, Kavaja, Shkozeti e Rrogozhina u përfshinë nga terri.
Burime nga OSHEE bëjnë me dije se ka rënë linja e OST Fier dhe Elbasan. Gjithashtu mësohet se ka pasur një defekt të rëndë në një linjë të tensionit të lartë në zonën e Beratit.
Sakaq nuk dihet ende se cili ka qenë shkaku që ka shkaktuar defektet në linjat përkatëse.
Nuk dihet sa do të zgjasë situata pa energji elektrike. Me përcaktimin e defektit pritet që furnizimi të kalojë nga linjat dytësore.
