48 orë pas prezantimit të programit nga Edi Rama me të cilin kërkon votat e shqiptarëve për mandatin e katërt, Sali Berisha akuzoi për plagjiaturë kreun e qeverisë. Nga selia blu, lideri i opozitës, tregoi dhe arsyet që sipas tij kanë nxitur Edi Ramën për të kopjuar programin e prezantuar më herët nga demokratët.
“Kopjimi i programit të PD nga Edi Rama, erdhi pas rënies dramatike të pikëve të tij në sondazhe, pasi shqiptarët e përcollën me neveri programin e tij për zhapinj, hardhucë, zhaba dhe thithlopa, e përcollën me neveri keqpërdorimin e bravës për të hutuar shqiptarët”, tha Berisha.
Më premtime për ulje taksash, rritje të ardhurash dhe benefite për të gjitha shtresat, lideri demokrat shpjegoi edhe një herë programin me të cilin opozita kërkon rikthimin në pushtet, ku nënvizoi se ekonomia do të jetë në qendër të çdo lëvizjeje në qeverisje.
Berisha premtoi rishikimin e ligjeve fiskale në 100 ditët e para pas marrjes së pushtetit dhe shtoi se çdo ndryshim ligjor do të mund të bëhet vetëm për të lehtësuar biznesin e jo për ta rënduar atë.
“Vendoset taksa e sheshtë 10 përqind mbi kapitalin. Taksa e sheshtë 10 përqind mbi të ardhurat jo nga paga. Zero taksim për profesionet e lira dhe biznesin e vogël. Tavani vjetor për tatim fitimin zero për biznesin e vogël. Kufiri i përjashtimit nga TVSH do jetë 18 milionë lekë xhiro vjetore. TVSH do ulet në 15 përqind, ikën tabuja 20 përqind”, u shpreh kreu demokrat.
Ndryshime do të pësojnë dhe taksat për pronën.
“Taksa 3 përqind e strehimit social mbi çmimin e shitjes shfuqizohet. Nuk do ekzistojë. Tarifa 1 përqind e lejes së zhvillimit mbi vlerën e investimit shfuqizohet. Tarifa e rivlerësimit të pronës do ulet nga 5 në 1 perqind”.
Lideri demokrat premtoi se programi ekonomik do të hyjë në fuqi brenda 3 muajve qeverisës, ku do të miratohet minimumi jetik prej 200 Eurosh dhe paga minimale do të shkojë në 500 Euro.
Marrja e pushtetit do të kalojë përmes zgjedhjeve të 11 majit, ku Berisha prej disa javësh ka kontraktuar Cris Lacivita si strateg të fushatës. Lideri demokrat pohoi se LaCivita shumë shpejt do të jetë në Shqipëri, por datën tha se e mban surprizë për vetëm një arsye.
Datën e ardhjes, po e lë si surprizë për Edi Ramën që t’i bjerë kokës në tavolinë kur të vijë.
