Kur mbeten vetëm 10 ditë nga nisja zyrtare e fushatës zgjedhore për parlamentaret e 11 majit, në Partinë Demokratike ende nuk janë ndezur motorët e fushatës me fuqi të plotë.
Megjithatë, plani i takimeve dhe hapjes së fushatës tashmë është gati në selinë blu. Burime bëjnë me dije se fushata e demokratëve do të hapet në sheshin “Nënë Tereza” në Tiranë me një takim të modelit toën hall. Më pas vetëm një ditë më pas do të ketë një takim të dytë në ambiente te mbyllura që do i dedikohet prezantimit të programit elektoral i cili deri më tani është prezantuar pjesë, pjesë përgjatë takimeve me grupet e interesit nga kryedemokrati Sali Berisha.
Mësohet se një pjesë e stafit të Chris LaCivita, që PD e ka kontraktuar për të dirigjuar fushatën, ka mbërritur në Tiranë dhe kanë nisur punën. Gjatë javëve të fundit të marsit, mësohet se ekipi i LaCivita ka punuar me pamjen vizive të fushatës dhe brandimit të koalicionit, bashkë edhe me sloganin, i cili është i njëjtë me emrin e koalicionit “Për Shqipërinë Madhështore”. Sakaq, pritet qe strategu amerikan të jetë në Tiranë në ditën e hapjes së fushatës.
Ndërkohë, pasditen e kësaj të marte, Sali Berisha ka planifikuar dy takime me strukturat e fushatës. Fillimisht, pasdite është planifikuar takimi me drejtuesit e qarqeve dhe kryetarët e degëve të PD dhe më vonë do të ketë një takim të dedikuar me kandidatët e Tiranës, si qarku ku opozita shpreson të përmbys rezultatin e 2021-it.
