Pas 28 vitesh në Zërin e Amerikës, gazetari Armand Mero emërohet drejtor i informacionit në Report Tv dhe Shqiptarja.com

Nga Carlo Bolino

Pas 28 vitesh të kaluara në Zërin e Amerikës, që nga sot kolegu Armand Mero merr drejtimin e informacionit në Report dhe Shqiptarja.com. Për mua është një rikthim i madh, njerëzor dhe personal përpara se të jetë profesional, sepse Armandi ka qenë ndër shqiptarët e parë (bashkë me kolegen Brikena Cani) që më qëndroi pranë që nga marsi 1991, kur erdha në Tiranë si i dërguar i ”La Gazzetta del Mezzogiorno” për të ndjekur zgjedhjet e para pluraliste, dhe prej asaj kohe ka mbetur një mik i shtrenjtë.

Ai ishte në krahun tim në vitin 1993, kur ideova krijimin e “Gazeta Shqiptare” (ku ka qenë edhe kryeredaktor), e para gazetë e përditshme me frymëzim europian që u lind në Shqipëri pas 45 vitesh izolimi komunist. Ishte pranë meje kur projektova Balkanweb, portali i parë informativ në gjuhën shqipe, si dhe News24, i pari televizion informativ “all neës” në vend. Ishte me mua edhe në momentin e krijimit të zyrës së agjencisë së lajmeve italiane ANSA në Tiranë, me të cilën ai vazhdon të bashkëpunojë. Së bashku kemi ndjekur tragjedinë e ’97, luftën në Kosovë dhe qindra ngjarje të tjera politike dhe aktualitet ndër vite.

Pastaj rrugët tona u ndanë: pasi ai nisi impenjimin me Voice of America dhe pronaret italiane shitën Balkanweb dhe News24, unë u largova përkohësisht nga Shqipëria. Megjithatë, kontaktet tona nuk u ndërprenë kurrë. Sot, më në fund, rikthehemi të punojmë sërish bashkë ne krye te grupi mediatik të ri që themelova.

Aemand Mero është një koleg i shkëlqyer për integritetin, profesionalizmin dhe për atë që unë e konsideroj virtytin më të çmuar të një gazetari: aftësinë për të kuptuar menjëherë thelbin dhe rëndësinë e lajmit. Nëse është e vërtetë që unë kam qenë një nga shkollat e gazetarisë moderne në Shqipëri, ai sot është dekani i kësaj shkolle. Ndër gazetarët shqiptarë që u formuan profesionalisht në fillim të viteve ’90, ai është ndër të paktët që, kur duhet, ngrihet nga tryeza dhe ndjek lajmet nga terreni. Në një vend ku opinionistët janë më të shumtë se gazetarët, ai mbetet një shembull i rrallë i një gazetari që fillimisht hulumton faktet dhe shqyrton dokumentet, dhe vetëm pas kësaj shpreh opinionin. Nuk është një gazetar “i ulur në kolltuk”, siç do të thoshte kolegu Arsen Rusta.

Informimi në Shqipëri po kalon një moment dramatik në shumë drejtime. Shpërndarja masive e rrjeteve sociale, obeziteti i një sektori që çdo ditë prodhon portale anonime, si dhe vështirësitë ekonomike të mediave tradicionale (si gazetat dhe tashmë edhe televizionet), po venë gjithnjë e më shumë në dyshim besueshmërinë e lajmeve që njerëzit lexojnë e dëgjojnë. Faji i parë i madh është i institucioneve publike, të cilat nuk kanë bërë kurrë asnjë përpjekje për të garantuar të paktën transparencën e pronësisë dhe të burimeve financiare të mediave. Faji i dytë i madh është i politikës, e cila e shfrytëzon këtë kaos për të shndërruar mediat në mjete shpifjeje dhe dezinformimi masiv. Fajtorët e tretë jemi ne gazetarët, apo të paktën ata që pranojnë të përdoren në kundërshtim me çdo normë etike dhe deontologjike, duke besuar se liria e shprehjes përfshin edhe të drejtën për të gënjyer. Pasi u bë vettingu në drejtësi dhe po bëhet në politikë, unë jam i bindur se në të ardhmen do të ketë një “vetting” (qoftë edhe vetëm profesional) edhe në gazetari, dhe do të mbijetojnë vetëm mediat profesionale.

Emërimi i Armand Meros në krye të informacionit të Report Tv dhe Shqiptarja.com përbën një kontribut të ri për përmirësimin e mëtejshëm të mediave tona. Puna e tij shumevjeçare me median ndërkombëtare, dhe për një çerek shekulli me gazetarinë amerikane, i ka dhënë një stil profesional dhe etik që mbetet unik në peizazhin informativ shqiptar.

Prania e tij nuk do të zbehë aspak rolin e strukturës aktuale të kryeredaktorëve, redaktorëve dhe gazetarëve që punojnë me mua çdo ditë me përkushtim dhe profesionalizëm. Përkundrazi, përvoja dhe ndershmëria e tij do të jenë një vlerë e shtuar për të pasuruar edhe më shumë cilësinë dhe pavarësinë e informacionit tonë.

Të gjithë kolegëve të Report Tv dhe Shqiptarja.com u uroj punë të mbarë, ndërsa Armandit i them thjesht: Mirë se u ktheve!