Administrata e presidentit Donald Trump po shqyrton mundësinë e arritjes së marrëveshjeve me disa shtete për të pranuar emigrantët e dëbuar nga Shtetet e Bashkuara
Siç raporton “Wall Street Journal”, mes vendeve të cilave Trump u ka kërkuar të pranojnë të deportuarit ështe edhe Kosova.
Media amerikane pretendon se SHBA po shpreson që këto vende, ku përfshihen gjithashtu Libia, Ruanda, Moldavia e Mongolia, do të pranojnë kërkesën në këmbim të marrëveshjeve financiare apo përfitimeve politike për ndihmën që do t’i ofrojnë Trump të përmbushë një prej prioriteteve kyçe.
“Administrata amerikane shpreson që këto shtete të bien dakord, ndoshta në këmbim të marrëveshjeve financiare apo përfitimeve politike. Ndër shtetet që SHBA ka kërkuar të pranojnë emigrantët e deportuar janë Libia, Ruanda, Benini, Eswatini, Moldavia, Mongolia dhe Kosova”, shkruan “Wall Street Journal”, duke cituar burime të njohura me procesin.
Një model për këtë qasje është përdorur në një marrëveshje të arritur me Panamanë në shkurt, sipas së cilës SHBA dërgoi një avion me mbi 100 emigrantë, kryesisht nga Lindja e Mesme, në këtë vend të Amerikës Qendrore.
Mbetet ende e paqartë nëse Kosova dhe shtetet e tjera të listuara do të pranojnë kushtet e propozuara nga administrata amerikane.
