Bursat amerikane pësuan një rënie të ndjeshme të enjten në mëngjes, menjëherë pas hapjes së tregut, pasi vendimi i Presidentit Donald Trump për vendosjen e tarifave ndaj pothuajse të gjitha importeve goditi rëndë tregjet financiare në mbarë botën.
Indeksi S&P 500 ra me mbi 4%, Dow Jones Industrial Average humbi 1,700 pikë, ndërsa Nasdaq, i mbushur me kompani teknologjike, pësoi një rënie pothuajse 5%.
Rënia drastike e çmimeve të aksioneve fshiu triliona dollarë nga tregjet brenda pak minutash, përcjell NBC News.
Një nga sektorët më të goditur ishte ai i shitjeve me pakicë, ku kompanitë e mëdha si Lululemon, Nike dhe Ralph Lauren humbën nga 10 deri në 11.5% të vlerës së tyre, pasi tarifat e vendosura nga Trump ndaj Kinës dhe vendeve të tjera eksportuese mund të arrijnë deri në 54%.
Gjithashtu, aksionet e ndërmarrjeve të vogla ranë me 4%, duke reflektuar frikën e investitorëve për pasojat e tarifave në ekonominë amerikane.
Tronditja e shkaktuar nga këto masa nuk u kufizua vetëm në Shtetet e Bashkuara, por u ndje fuqishëm edhe në tregjet globale. Indeksi kryesor i Japonisë, Nikkei, ra me 2.7%, ndërsa në Europë, Stoxx 600 humbi më shumë se 2.2%.
Gjermania, Franca dhe Italia pësuan rënie të ngjashme prej rreth 3%, ndërsa tregu britanik, FTSE 100, ra me 1.5%.
Analistët ekonomikë paralajmërojnë se tarifat e Trump mund të çojnë në një krizë të re ekonomike globale dhe të shkaktojnë stagflacion, një skenar që përfshin inflacion të lartë dhe rritje të ngadaltë ekonomike.
Një tjetër goditje për tregjet ishte hyrja në fuqi e tarifave prej 25% për automjetet e importuara, ndërsa tarifa të reja për pjesët e makinave pritet të hyjnë në fuqi më 3 maj.
Kjo do të thotë se brenda një muaji, çdo makinë e shitur në Shtetet e Bashkuara do të jetë e prekur nga këto masa.
Me këtë lëvizje, Presidenti Trump synon të reduktojë deficitin tregtar të vendit dhe të rrisë prodhimin e brendshëm, por ekspertët paralajmërojnë se efekti i menjëhershëm mund të jetë një ngadalësim i ekonomisë globale dhe një valë reagimesh nga partnerët tregtarë të SHBA-së.
Për momentin, investitorët mbeten në ankth për të parë se si do të përgjigjen vendet e tjera, ndërsa frika për një luftë të plotë tregtare po rritet me shpejtësi.
