Bashkimi Evropian “nuk duhet të përjashtojë asgjë” për t’u hakmarrë ndaj të ashtuquajturave tarifa të “Ditës së Çlirimit”, tha Emmanuel Macron duke u shprehur kundër vendimit të Donald Trump për të vendosur tarifa reciproke për pothuajse çdo vend.
Macron e ka quajtur masën “brutale” dhe “të pabazuar” dhe ndërkohë kërkoi një ndalim të përkohshëm të investimeve të ardhshme evropiane në Amerikë.
Pauza, tha ai, duhet të zgjasë “derisa të kemi sqaruar gjërat me Shtetet e Bashkuara”.
“Cili do të ishte mesazhi që lojtarët kryesorë evropianë të fillojnë të investojnë miliarda euro në ekonominë amerikane në momentin kur ata po na godasin?” , u shpreh presidenti i Francës Emanuel Macron tha gjatë një takimi me përfaqësuesit e industrisë franceze.
“Ne duhet të kemi solidaritet kolektiv”.
Gjatë fjalimit të tij, Macron nuk u përmbajt ndaj nismës së paprecedentë të Trump, e cila do të godasë Bashkimin Evropian me një normë prej 20% duke filluar nga 9 prilli.
Më vete, blloku do të përballet me norma 25% për eksportet e çelikut, aluminit dhe makinave, të cilat tashmë janë në fuqi.
Macron u duk mosbesues në pritjet e Trump se detyrimet e larta do ta ndihmojnë SHBA-në të reduktojë deficitet që ka me partnerët tregtarë, përfshirë bllokun.
Formula me të cilën Shtëpia e Bardhë ka llogaritur normat është kritikuar shumë .
Në vitin 2023 , BE-ja regjistroi një suficit mallrash me SHBA-në me vlerë 156.6 miliardë euro, por një deficit shërbimesh me vlerë 108.6 miliardë euro.
“Vendimi që u shpall mbrëmë është brutal dhe i pabazuar. Është i pabazuar sepse disbalancat tregtare nuk mund të korrigjohen me vendosjen e tarifave,” tha ai.
“Themelet e teorisë ekonomike tregojnë të kundërtën, veçanërisht kur disbalancat nuk marrin parasysh shërbimet dixhitale”.
Macron parashikoi se tarifat reciproke do të ishin të menjëhershme dhe të paqëndrueshme për ekonominë amerikane, duke i bërë firmat dhe qytetarët amerikanë “më të dobët” dhe “më të varfër”.
