Një përplasje ushtarake me Iranin do ishte shumë pranë nëse përpjekjet për të rinegociuar një marrëveshje të re bërthamore dështojnë, paralajmëroi ministri i Jashtëm francez Jean-Noel Barrot.
Presidenti amerikan Trump, e ka kërcënuar Teheranin me një fushatë bombardimesh nëse nuk frenon programin bërthamor,i cili sipas Uashingtoni synon zhvillimin e armëve atomike. Qeveria iraniane, e cila mohon me forcë pretendimet, është zotuar të hakmerret kundër çdo sulmi, shkruan RT.
Duke iu drejtuar deputetëve francezë të mërkurën pas një takimi të qeverisë mbi Iranin, të udhëhequr nga presidenti Emmanuel Macron, Barrot deklaroi se pa një marrëveshje të re, “një përplasje ushtarake do dukej pothuajse e pashmangshme”, duke paralajmëruar se një skenar i tillë mund të destabilizojë më tej Lindjen e Mesme.
Në vitin 2015, Irani dhe fuqitë e mëdha botërore nënshkruan marrëveshjen e Planit të Përbashkët Gjithëpërfshirës të Veprimit (JCPOA), e cila kufizoi veprimtarinë bërthamore të Teheranit në këmbim të lehtësimit të sanksioneve. Në vitin 2017, Trump u tërhoq nga marrëveshja, të cilën ai dhe kryeministri izraelit Benjamin Netanyahu e cilësuan “marrëveshja më e keqe ndonjëherë”, duke zgjedhur në vend të kësaj një fushatë “presioni maksimal” përmes sanksioneve.
BE-ja u përpoq t’i siguronte Iranit mjete për të anashkaluar presionin amerikan për të ruajtur JCPOA, por negociatat që atëherë kanë ngecur.
Që nga fillimi i mandatit të dytë presidencial në janar, Trump ka paralajmëruar veprime ushtarake nëse Teherani nuk bie dakord për një marrëveshje të re bërthamore. Në një intervistë të fundit, ai deklaroi, “Nëse ata nuk bëjnë një marrëveshje, do ketë bombardime. Dhe do jetë një bombardim të cilin ata nuk kanë parë kurrë më parë.”
Udhëheqësi suprem iranian Ayatollah Ali Khamenei iu përgjigj Trump-it të hënën, duke paralajmëruar se SHBA-ja dhe Izraeli “do marrin patjetër një goditje të fortë” nëse sulmojnë Iranin.
