Dy gazetarë nga Shqipëria dhe Kosova, Edison Ypi dhe Leonard Kërquki, kanë shprehur publikisht mbështetjen e tyre për Agron Shehajn, në prag të zgjedhjeve të 11 majit, duke vlerësuar qasjen e tij ndryshe në politikë dhe komunikimin e drejtpërdrejtë me qytetarët.
Drejtor i T7 dhe Gazeta Express, Leonard Kërquki, vlerësoi në një postim në rrjetet sociale mënyrën se si Agron Shehaj po zhvillon fushatën e tij, duke e cilësuar “fantastike” dhe të paimagjinueshme nga politikanët tradicionalë.
“Pa dashur të marr anë në zgjedhjet në Shqipëri, meqenëse kjo është punë e qytetarëve shqiptarë, megjithatë fushata online e Agron Shehaj është fantastike. Politikani që garon përballë dinosaurëve të politikës së atjeshme që kontrollojnë çdo gjë, ka gjetur çelësin e komunikimit me njerëzit e tij përmes rrjeteve sociale si askush më parë,” – shkruan Kërquki, duke shtuar se është kurioz të shohë nëse kjo fushatë do të ketë sukses më 11 maj.
Ndërsa shkrimtari dhe opinionisti i spikatur Edison Ypi shkon edhe më tej, duke e cilësuar Agron Shehajn si të vetmin politikan të pangjajshëm në këtë garë.
“Në tollovinë e sotme socio-politike, Agron Shehaj është i vetmi individ i pangjajshëm, i ndryshëm, i natyrshëm, me rrasht politik serioz, denbabaden, autentik,” – shkruan Ypi në një koment të gjatë.
Duke ironizuar kandidatët e tjerë si “përfaqësues të nomenklaturës, pinjollë të diktaturës apo hajdutë me licencë”, ai thekson se Shehaj nuk ngjan me askënd sepse nuk vjen nga e njëjta rrugë e konsumuar dhe e deformuar.
“Ata që ngjajnë, vjedhin. Ata si Agron Shehaj, kryejnë punët, ruajnë ekuilibrat, mbajnë gjallë shpresën.”
Në përmbyllje, Ypi e portretizon Shehajn si një njeri me vizion të qartë, ndershmëri, dhe gatishmëri për të përballuar realisht sfidat e vendit.
“Me seriozitetin dhe vullnetin që e karakterizon, Agron Shehaj do e bëjë Shqipërinë më serioze, më dinjitoze, më hijerëndë. Ai e ka të qartë se në politikë nuk hyhet për të vjedhur, por për të ndrequr dhe begatuar vendin”, shkruan Ypi.
