Prej disa ditësh, në media po publikohen pjesë nga bisedat që kryebashkiaku i arrestuar Erion Veliaj ka bërë nga qelia e paraburgimit të Durrësit me njerëz jashtë, si me vëllain Arbër, gruan Ajola Xoxa, etj. Gazetari Andi Tela deklaroi në emisionin “Të Paekspozuarit” në MCN TV se dyshohet që këto biseda kanë dalë nga SPAK, sepse janë faksimile dhe se prokuroria i ka hedhur në treg për të pasur pozicionin e saj në raport me Veliajn.
“Ne dyshojmë se janë nxjerrë nga SPAK sepse janë faksimile. Dëgjuam që ka përgjime të Veliajt. Ditën e gjyqit u përfol që prokuroria çoi prova të reja në gjykatë dhe këto prova shtonin akuzën mbi Veliajn. Prisja, përtej këtyre që u folën të kishte prova reale, që Veliaj të fliste për mënyrën si do të intimidonte dëshmitarët, për të fshehur prova, para, dokumenta e me radhë. Këto do të konsideroheshin si prova në kurriz të tij. Por ai thotë le ta marrin vesh të gjithë, pra e dinë se janë në përgjim. Ai ka bërë biseda që sipas mendjes së tij nuk e rëndojnë situatën e tij.
Ne kemi lexuar një pjesë të vogël, mund të ketë edhe të tjera.
Prokuroria i ka hedhur në treg për të pasur pozicionin e saj në raport me Veliajn. Prokurorët nuk flasin dot në publik, ndaj kanë hedhur këto fletë për të qëndruar ata në raport me Veliajn”- tha Tela.
