Presidenti amerikan Donald Trump ka kërcënuar sërish se do të përdorë forcën ushtarake ndaj Iranit, nëse Teherani nuk pranon të heqë dorë nga programi i tij bërthamor. Gjatë një deklarate për mediat, Trump theksoi se Izraeli do të jetë “lider” i çdo sulmi të mundshëm, ndërsa Shtetet e Bashkuara do të ndërhyjnë “nëse është e nevojshme”.
Deklaratat u bënë pak ditë para bisedimeve mes zyrtarëve amerikanë dhe iranianë, të cilat pritet të zhvillohen këtë fundjavë në Oman. Trump tha se bisedimet do të jenë “të drejtpërdrejta”, ndonëse Irani i përshkroi ato si “të tërthorta”. Ai shtoi se nuk ka një afat të caktuar për përfundimin e tyre, por do të vendosë nëse duhet të ndërpriten nëse vëren se nuk po sjellin rezultat.
Trump theksoi: “Nëse përdorimi i forcës bëhet i nevojshëm, Izraeli do të jetë goxha i përfshirë, natyrisht.”
Shtetet e Bashkuara janë gjithnjë e më të shqetësuara, pasi Irani duket më pranë se kurrë ndërtimit të një arme bërthamore. Ndërkohë, Teherani vazhdon të këmbëngulë se programi i tij ka vetëm qëllime paqësore. Në vitin 2015, u arrit një marrëveshje ndërkombëtare për të kufizuar pasurimin e uraniumit nga Irani në këmbim të lehtësimit të sanksioneve. Por, Trump e tërhoqi SHBA-në nga marrëveshja në vitin 2018, duke e cilësuar si “marrëveshjen më të keqe ndonjëherë”.
