Kryetari i Partisë “Mundësia”, Agron Shehaj, zhvilloi një vizitë në një punishte çadrash në qytetin e Fierit, ku u takua me sipërmarrësin dhe punonjësit e saj.
Shehaj deklaroi se arsyeja pse takon biznesmenë dhe sipërmarrës në bizneset e tyre është sepse përpos Shqipërisë që del nëpër ekrane, ka një realitet tjetër. Është Shqipëria e punës, e përpjekjes, e krijimit, dhe që nuk kërkon as lëmoshë, as privilegje, por thjesht një shtet që mos ta pengojë.
“Janë shqiptarët që kërkojnë t’ia dalin me punë. Si zotëria, që jo vetëm që kërkon t’ia dalë për veten e tij dhe familjen e tij, por me punën e tij ka mundësuar që me qindra familje të tjera të kenë mundësi që këtu ku janë të punojnë dhe me të ardhurat që fitojnë të mbajnë familjet e tyre” – u shpreh Shehaj mes të tjerash.
Kjo vizitë është pjesë e turit elektoral të Partisë “Mundësia”, që synon të vërë në qendër të debatit publik qytetarin e zakonshëm, punën, sipërmarrjen dhe mundësinë për një ekonomi të ndershme, të çliruar nga lidhjet me politikën.
