Pas takimeve në Shkodër, Lezhë e Durrës, turi elektoral i Partisë Mundësia iu drejtua qytetit të Fierit, dhe rrugës kreu Agron Shehaj bëri një deklaratë të fortë për partitë e vjetra.
Në autobusin elektoral, Agron Shehaj u shpreh se zgjedhjet e 11 majit do të jenë të fundit ku garojnë partitë e vjetra siç kanë qenë deri tani, pasi shqiptarët duan të sjellin ndryshimin me votë në Shqipëri, dhe drejtësia njëkohësisht po lufton pandëshkueshmërinë.
“Unë pavarësisht se çfarë duan t’u tregojnë qytetarëve unë jam i bindur që këto zgjedhje do jenë zgjedhjet e fundit për partitë politike kështu siç edhe ne i njohim. Këto janë zgjedhjet e fundit. Kështu që për të gjithë ata që u thonë shqiptarëve që do zgjidhni mes të vjetrës dhe të vjetrës, këto do jenë zgjedhjet e fundit për partitë e vjetra kështu siç i njohim ne, koha po vjen, ky është një moment historik për Shqipërinë, më në fund drejtësia po vepron dhe po merr fund pandëshkueshmëria në këtë vend e po çlirohen qytetarët shqiptarë nga grabitqarët që i kanë penguar në këto 34 vjet” – u shpreh Agron Shehaj.
Shehaj bëri edhe një thirrje për qytetarët që të bëhen pjesë e çeljes së fushatës elektorale të Partisë Mundësia ditën e dielë, 13 prill, në Pallatin e Kongreseve, në orën 17:00.
“Të dielën ne kemi hapjen zyrtare të fushatës elektorale ju ftoj të gjithëve të vini në Pallatin e Kongreseve, në orën 17:00, na shkruani këtu, në rrjetet sociale, kemi nevojë për mbëshetetjen tuaj, ju presim. U garantoj që pjesëmarrja e secilit prej tyre është jetike për rrugëtimin tonë për të ndryshuar Shqipërinë e për ta bërë një vend ku mund t’ja dalësh me punë të ndershme”.
Pas Fierit, autobusi elektoral i Partisë Mundësia do të ndalet në Selenicë, Himarë e në fund në Sarandë. Risia e kësaj fushate të partisë Mundësia është transmetimi live i aktivitetit dhe takimeve për 10 orë në të gjitha rrjetet sociale, Youtube, Tik Tok, Facebook dhe Instagram të kryetarit Agron Shehaj.
