Kryeministri Edi Rama, në fjalën e mbajtur gjatë hapjes së fushatës elektorale të Partisë Socialiste, bëri një pasqyrim të ofertës elektorale të PS për zgjedhjet e 11 majit. Në shumicën e argumentave të dhënë, Rama kërkoi votën e shqiptarëve për PS, si një forcë që mund ta integrojë Shqipërinë në Bashkimin Evropian brenda dy viteve. Ai shtoi se socialistët janë të vetëm garantorë të reformës në drejtësi, në mënyrë që ajo të mos ketë kthim mbrapa.
Gjithashtu, kryesocialisti tha se PS synon ta rrisë pagën mesatare në 1200 euro dhe pensionin minimal në 200 euro.
“Vetëm Shqipëria 2030 në BE e blkonon përfundimisht pa asnjë mundësi prapaskenash, themelin e barazisë para ligjit që partia socialiste e Shqipërisë pati kurajon ta hedhë. Deri atëherë, kur ne ta fusim zonjën Shqipëri në sallonin e madh kryesor të shtëpisë evropiane, vetëm shqiptarët e bashkuar me mua dhe me ju këtu mund të mbrojnë drejtësinë e re nga çdo orvatje destruktive, mund të mbyllin negociatat me BE brenda dy viteve, mund të rrisin prodhimin e brendshëm bruto nga 25 miliardë euro në 35 miliardë euro, mund të rrisin të ardhurat për frymë që ishin vetëm 3 mijë e pak euro kur ne morëm detyrën, nga afro 10 mijë e 400 euro që janë sot në të paktën 15 mijë euro, mund të rrisin pagën mesatare në sektorin publik, që e gjetëm 372 euro nga 1 mijë euro që është sot, në të paktën 1200 euro,” tha Rama.
Rama theksoi se synimi i mandatit të katërt është për të finalizuar procesin e integrimit dhe për ta ulur Shqipërinë në tryezën e Bashkimit Evropian.
“Ishte e thënë që fati ynë të na sillte në një përballje të tillë, si përfundimtare në historinë tonë të gjatë dhe të mundimshme, duke na e dhënë neve shqiptarëve të dekadës së tretë të shekullit 21 shansin që t’ia ndryshojmë përgjithnjë rrjedhën historisë. Tamam këtu, tani, mu në një kryqëzim mes një palë zgjedhjesh politike për partinë që do të qeverisë 4 vjet dhe një mundësie historike për Shqipërinë që në vetëm 4 vjet mund të bëhet zonjë anëtare e familjes së bashkuar evropiane. Ne dhe vetëm ne dhe askush tjetër, kemi në dorë fatin evropian të Shqipërisë. Kemi 30 ditë përpara për t’u lidhur dorë për dore me çdo shqiptar e shqiptare që e do zonjën e Shqipërisë në sallonin e BE dhe veten e vet qytetarë e qytetare të barabartë të Evropës,” tha Rama.
