Qeveria franceze do të zbatojë masa më të ashpra për ndalimin e përdorimit të telefonave celularë në shkollat e mesme, duke filluar nga shtatori.
Sipas Ministrisë së Arsimit, nxënësit e moshës 11 deri në 15 vjeç do të duhet t’i mbyllin telefonat në dollapë ose çanta dhe do t’i përdorin ato vetëm pas përfundimit të orëve mësimore.
Ministrja e Arsimit, Elisabeth Borne, e cilësoi këtë masë si një “pauzë dixhitale” të detyrueshme për të përmirësuar përqendrimin dhe shëndetin mendor të nxënësve, duke theksuar se “efektet negative të ekraneve janë gjithnjë e më të qarta” dhe kjo është një masë thelbësore për suksesin e fëmijëve në shkollë.
Ky ndalim nuk është i ri për Francën, pasi një ligj i vitit 2018 tashmë ndalon përdorimin e telefonave në shkollat e mesme. Megjithatë, shumë nxënës kanë vazhduar të përdorin pajisjet e tyre fshehurazi gjatë pushimeve. Qeveria beson se me zbatimin e kësaj mase të re do të eliminohen shpërqendrimet dhe do të rritet ndërveprimi social mes nxënësve.
Skema është testuar në 100 shkolla dhe ka dhënë rezultate pozitive: përmirësim të përqendrimit, më pak ngacmime dhe më shumë aktivitet fizik. Masa ka marrë mbështetje të gjerë nga mësuesit dhe prindërit, megjithëse disa sindikata kanë shprehur shqetësime për logjistikën dhe kostot e zbatimit.
Gjithashtu, një studim ka zbuluar se të rinjtë shpenzojnë pesë orë në ditë përpara ekraneve, por vetëm tre orë në javë duke lexuar libra, një rënie që ministrja Borne e ka cilësuar shqetësuese për suksesin akademik të nxënësve.
Një raport i fundit nga presidenti Emmanuel Macron ka rekomanduar gjithashtu kufizimin e përdorimit të smartphone-ve për fëmijët para moshës 13 vjeç dhe kufizimin e aksesit në rrjetet sociale deri në moshën 18 vjeç.
