Kryeministri Edi Rama zhvilloi një takim me shqiptarët në Milano, ku iu drejtua atyre me thirrjet për të mos e shpërdoruar votën.
“Të marrësh mundimin për të votuar dhe pastaj ta hedhësh votën në një kënetë, është vërtet turp,” tha ai, duke iu referuar partive të reja apo atyre që, sipas tij, ofrojnë “qiqra në hell”.
“Janë dhe ca të tjerë që vijnë vërdallë, ne jemi dhe forcë e re, jo bëhet jo s’behët, jo mundet jo s’mundet, jo bashkë jo veç, kanë mbushur listat me farefis, vjehrrin, vjehrrën, baxhanakët, e ju premtojnë qiqra në hell, tha Rama për partitë e reja, ndërsa shtoi se ato të re kanë vetëm fytyrën dhe moshën e kryetarëve.
“Më keni si ropt e shtëpisë, deri në 11 maj bëni kujdes kur hapni frigoriferin se do u dal dhe aty. Duhet të kuptoni që çdo gjë tjetër, të të vij zarfi me votën, do e hapësh zarfin, do ulesh dhe të vësh votën, ta fusësh në zarf e të marrësh rrugë për ta çuar te posta, dhe ta bësh gjithë këtë mundim për ta hedhur votën në një kënetë, është vërtet turp.
Janë dhe ca të tjerë që vijnë vërdallë, ne jemi dhe forcë e re, jo bëhet jo s’behët, jo mundet jo s’mundet, jo bashkë jo veç.
Dëgjoni, ato të re kanë vetëm fytyrën dhe moshën e kryetarëve, asgjë të re, kanë mbushur listat me farefis, vjehrrin, vjehrrën, baxhanakët, e ju premtojnë qiqra në hell. Të çosh votën edhe për ata, është ta çosh dëm.
Ne na duhet të bëhemi një, të bëhemi tamam si gishtat e kësaj dore, dhe ta vendosim vetëm fatin evropian të Shqipërisë. Pas 11 majit, me 16 maj, e gjithë Evropa, do të zbresë në sheshin Skënderbej, të gjithë udhëheqësit e kontinentit”.
Rama e mbylli fjalën e tij në takimin me shqiptarët në Milano duke i dhënë një mesazh demokratëve.
“Demokratët i pyes çfarë do fitoni ju më shumë për veten tuaj dhe familjen tuaj për Shqipërinë çfarë do fitoni duke shkuar pas berihajit të një bufi plak që do rikthehet për të tretën herë. Herën e parë e shkatërroi fare Shqipërinë, hera e dytë e futi në gropë Shqipërinë me borxhe. Herën e tretë është në gropë vetë dhe thotë hajdeni t’ju fus në gropën madhështore. Çfarë doni më?
Nuk ju mjafton ajo që ndodhi me primaret, ku bufi i nxori të gjithë dhe tha vota juaj asht ligj për mue. Kush doli i pari përfundoi thellë në barkun e bufit, i kullufiti të gjithë. Asnjërin nuk la. A thua se i tha dilni tju shosh kush ka vota ta ha. Si mund të diskutohet zgjedhja në 11 maj. Zgjedhja është me flamurin tonë dhe të BE-së, apo me leckën e kënetës. Duke ju falënderuar për mikpritjen, për energjinë dhe për këtë emocion, ju them se në 11 maji do kemi një festë të madhe për Shqipërinë europiane. Do marrim fitoren më shembullore, jo për vete, jo për mua por për mbarë kombin dhe shtetin tonë”- tha Rama.
