Një debat i ashpër shpërtheu mes gazetares Klodiana Lala dhe ish-kryebashkiakut të Mallakastrës Agron Kapllanaj. Lala akuzoi ish-kryebashkiakun se njerëz të lidhur me të janë përplasur me hetues të BKH-së një ditë më parë dhe se kontrollojnë informacione të ndjeshme në qytetin e Fierit.
“Ju keni nënshtruar policinë, merrni informacion të paautorizuar dhe të dhëna sensitive për qytetarët”, deklaroi Lala, duke e akuzuar Kapllanajn për shtrirje të ndikimit të tij në polici dhe institucione të tjera.
“Kemi të bëjmë me një grup të fortësh në qytetin e Fierit, siç po e tregoni ju fisin tuaj që shkon dhe kontrollon çdo rrugicë për të gjetur një makinë se qenkan ndjerë të kërcënuar sepse nuk kishin besim të policia e shtetit dhe policia ju jepte informacion. Mos ia thoni këto gjera njeriu. Ata mund të ishin njerëz të thjesht dhe nuk do ta gjenin kurrë të drejtën në mënyrën sesi ju silleni ne atë qytet, në mënyrën sesi ju keni shtrirë tentakulat në atë qytet. Rastisën që janë të BKH, sepse ju do ta kishit shkrirë popullin e thjeshtë. Turp për ju që i thoni. I pari që duhet të jepni llogari për këtë gjë jeni ju që merrni dhe nënshtroni policinë, merrni informacion të paautorizuar dhe të dhëna sensitive për qytetarët”, tha Lala.
Incidenti për të cilin bëhet fjalë lidhet me një përplasje fizike mes disa personave pranë Kapllanajt dhe hetuesve të Byrosë Kombëtare të Hetimit, që ishin në operacion për ndjekjen e një rasti nën hetim në Fier.
