Sali Berisha, gjatë një bashkëbisedimi me prodhuesit e bimëve medicinale, ka hedhur akuza ndaj kryeministrit Edi Rama duke thënë se “ofron alternativën e një fermeri që thotë; ‘prodhimi u kalb, nuk e shita dot, ferma më falimentoi por unë do të votoj ty’”.
Lidhur me fermerët, Berisha tha se me Ballkanin e Hapur, Rama ka dëmtuar prodhimin bujqësor dhe blegtoral, duke thënë se një deng bari u bë më i shtrenjtë sesa një litër qumësht.
Ai mendon, se litri i qumështit duhet të jetë më i shtrenjtë se një deng bari.
Ndoshta ngaqë ka kohë që s’ka qenë në fshat dhe se di çfarë është dengu i barit.
“Çfarë alternative sugjeron Edi Rama. Alternativën e një fermeri që thotë prodhimi u kalb, nuk e shita dot, ferma më falimentoi por unë do të votoj ty. Kjo është me zë dhe figurë. Edi Rama ofron alternativën më të keqen që mund të ofrojë një njeri. Ofron shpëlarjen e trurit të njeriut, që përbën edhe fatkeqësinë më të madhe njerëzore. Ne që kemi kaluar diktaturën komuniste, e dimë çfarë do të thotë.
Edi Rama, prodhimin bujqësor dhe blegtoral, e bëri me Ballkanin e Hapur, hapi kufijtë. Bëri garë të pandershme dhe fermerët falimentuan. Rriti imputet. Fermerët e Maliqit kanë prerë gjysmën e lopëve. Dengu i barit u bë më i shtrenjtë se kilja e qumështit.
Futi qumështin pluhur pa taksa. Shqiptarët blejnë djathë të bërë me qumësht pluhur. Ai e bazon qëndrimin e fermerëve në shpëlarjen e trurit.
Kam besim të madh që më 11 maj, fermerët shqiptarë do të jenë masiv në votën e tyre për fermën madhështore, bujqësinë madhështore, Shqipërinë madhështore”, tha ai.
