Kryetari i partisë Mundësia, Agron Shehaj dhe kandidatja e renditur e treta në listën e Tiranës, Barbara Doda, ishin të ftuar në emisionin “Të Paekspozuarit” në MCN TV. Shehaj tha se synon aq deputetë sa për një grup parlamentar, ndërsa Doda tha se ngjan shumë me Agronin.
Pjesë nga biseda:
Agron Shehaj: Pritshmëria është e madhe, por nëse e krahasojmë se nga u nisëm para një viti dhe sot ku kemi ngritur struktura në të gjithë Shqipërinë… Të dielën bëmë hapjen e fushatës te Pallati i Kongreseve, të hënën ishim në Shkodër. Nuk shoh asnjë parti të që bën aktivitete si ne. Në rrjetet sociale kemi rritje të ndjekëve. Po përcjellim mesazhin tonë për një Shqipëri që ia del me punë, se ka një Shqipëri tjetër, e njerëzve që punojnë me punë të ndershme.
Jemi parti e re dhe nuk synojmë të marrim pushtetin. Në bëjmë çdo të shtunë sondazhe që na thonë se kemi rritje. Sondazhet e fundit si të News 24 dhe Euronews na tregojnë se jemi partia e dytë pas PD-së. Pritshmëri është që të marrim një numër deputetësh dhe që të bëjmë një grup parlamentar dhe duket i realizueshëm ky qëllim.
Ylli Rakipi: Thonë se këtë parti nuk e ke bërë për të vjedhur se ke vetë para, por për protagonizëm sepse e ke patologjike nevojën për protagonizëm. Çfarë u thoni këtyre?
Agron Shehaj: Që unë bashkë me bashkëthemeluesit, kemi krijuar një parti sepse duam të bëjmë diçka të madhe, të rëndësishme, që të shkojë në të mirën e vendit. Por, shumë mirë bëjnë që thonë se e bëjmë për këtë. Kjo na dallon nga të tjerët. Partitë e vjetra kanë treguar se kanë hyrë në politikë për tu pasuruar. Nuk kishin kokërr leku dhe tani janë bërë milionerë. Kemi parti të reja të tjera, që pa patur pushtet akoma, ose me pak pushtet dhe lidhje, kanë bërë në disa rate më shumë se ata që kanë patur pushtetin. Kjo akuzë apo opinion, na bëhet qejfi që e mendojnë kështu.
Barbara Doda: Unë bëra studime për arkitekturë dhe me arkitekturë merrem. E fillova profesionin t’i rrija larg politikës. E ndjeja që kisha njëfarë thirrje, por kisha parë të prindërit e mi zhgënjim. Por kur fillova punën kuptova se po ju rregulloja njerëzve shtëpitë, por jo jetën. Dua të kem një impakt më të madh, të përmirësoj edhe jetën e tyre.
Unë vij nga familje e persekutuar, ngjaj me Agronin. Kemi bërë rrugëtim të ngjashëm. Ne nuk kemi trashqguar asgjë. Bashkë me familjet tona i jemi përkushtuar punës. Agroni pak më shumë dhe është bërë milioner. Të mëson shumë vlera, që duhet të jesh në krah të të drejtës dhe padrejtësisë t’i dalësh në ballë.
Në 2021 e kam takuar Agronin kur kemi bërë fushatën për Tiranën dhe mu duk një person i ngjashëm me veten. Kur Agroni vendosi të hapte partinë nuk kishte nevojë për një ftesë. Partia Mundësia ishte gjëja e duhur për të bërë.
