Merr tjetër kthesë dinamika e atentatit me 4 të plagosur në Tiranë. Grupi hetimor ka dyshime se shënjestër e atentatit të ketë qenë gruaja e Roan Brahimajt, babai i të cilit u vra po pasditen e djeshme në Pllanë të Lezhës.
Dyshimet janë pasi gruaja e tij përdor makinë të ngjashme me atë të 4 personave të plagosur në Lundër mbrëmjen e djeshme, vetëm pak orë pas ngjarjes në Lezhë.
Mësohet se gruaja e Brahimit ka edhe shtëpinë afër me familjen Demiraj. Burime bëjnë me dije se ka dyshime të forta që shënjestër e sulmit të ketë qenë gruaja e Roanit dhe 4 të plagosurit të jenë qëlluar gabimisht.
Hetuesit dyshojnë se grupi i vrasësve ka pasur 2 plane ditën e djeshme, eliminimin e disa familjarëve të familjes Prendi, por në njërën prej tyre koincidenca e ngjashmërisë së makinës ka bërë të ngatërrohet tërësisht objektivi.
Dinamika e atentatit në Tiranë
Nipi dhe djali i pronarit të “Pelikani Security” bashkë me shokun e tyre, të shoqëruar nga shoferi i kompanisë, ishin duke festuar ditëlindjen e 11-vjeçarit dhe mësohet se kanë qenë në Pjezë të Shijakut te “Arena Karting Albania”, pistë për gara me makina. Ata kanë qenë të shoqëruar nga shoferi Arens Stafa 34-vjeç dhe kur kanë qenë duke u kthyer për në banesat e tyre në Lundër, në një prej rezidencave luksoze në kryeqytet, kur autorët i kanë zënë në pritë dhe kanë qëlluar në drejtim të tyre.
Gjatë kthimit, janë futur në Unazë për të dalë në Lundër dhe kur janë futur te rrethrrotullimi i Shkozës rreth orës 21:30 për vijuar ecjen në autostradë. Në këto momente autorët që dyshohet se kanë qenë dy, i kanë zënë në pritë me një motor dhe i janë afruar mjetit luksoz “G Class” dhe kanë nisur të qëllojnë me armë zjarri në drejtim të tyre deri te Agropark (Tregu Agro Ushqimor) ku ka qenë pika kulminante e të shtënave me armë.
Më pas autorët larguar në drejtim të paditur. Shoferi 34-vjeçar në përpjekje për t’iu larguar autorëve ka vijuar të drejtojë mjetin deri në afërsi të Lundrës, aty ku dyshohet se është përplasur pasi nuk kanë funksionuar frenat dhe më pas ka humbur edhe ndjenjat.
Kanë qenë persona të rastësishëm që i kanë gjetur të plagosur dhe më pas i kanë dërguar në spitalin e Traumës për të marrë ndihmë mjekësore. 11-vjeçari ndodhet ende në gjendje të rëndë shëndetësore, pasi plumbat e kanë prekur në kraharor. Djali i pronarit të “Pelikani Security” ndodhet në një spital privat në Tiranë, 19-vjeçari është në gjendje stabël, bashkë me shoferin 34-vjeçar.
Një grup hetimor po punon për zbardhjen e ngjarjes, ndërsa deri më tani nuk ka asnjë gjurmë nga autorët. Hetuesit ende nuk kanë një pistë konkrete për këtë ngjarje të rëndë. Hetuesit kanë marrë deklarimet e para të të rinjve të plagosur, të cilët mësohen se kanë deklaruar se nuk kanë pasur asnjë konflikt.
