Kreu i Partisë Mundësia, Agron Shehaj, u prit ditën e sotme nga qindra qytetarë të Kamzës, teksa Partia Mundësia prezantoi kandidatët e qarkut të Tiranës.
Në fjalën e tij, Shehaj tha se pritshmëritë e forcës së tij politike janë rritur ndjeshëm, pasi sondazhet e nxjerrin forcë të tretë në vend, por nuk do të jetë çudi që në ndonjë qark Mundësia të renditet edhe si forcë e dytë.
“Nëse pritshmëria jonë në fillim ishte të merrnin 10% të votave, tani po na shtohet oreksi dhe po rrisim edhe pritshmëritë. Është një arritje për ne si parti e re që të hyjmë në Parlamentin e ardhshëm me një grup parlamentar.
Është arritje të jemi, siç e keni parë, që jemi partia e tretë, duke patur parasysh që kemi një vit që ekzistojmë, është një rezultat jo i vogël. Mos t’ju duket e pamundur që në ndonjë qark të jemi edhe partia e dytë”, tha Shehaj.
Për kreun e Mundësisë, ka një grup analistësh që tentojnë të bindin qytetarët se partitë e reja nuk do ia dalin, por pikërisht këto komente janë ato që i shtyjnë të punojnë më shumë, pasi kandidatët e Mundësisë janë njerëz që ia kanë dalë vetë falë punës së ndershme.
Gjithashtu, Shehaj siguroi mbështetësit e partisë së tij se asnjë votë nuk do preket, pasi Mundësia do të ketë vëzhguesit e saj në çdo qendër votimi.
“E vërteta është që ndryshimin nuk mund ta ndalësh. Fatkeqësisht, rrëzimi i komunizmit në Shqipëri erdhi i fundit, dhe tranzicioni këtu po vonohet, por është një proces që do ndodhë. Edhe ju dëgjoni si ka një grup jo të vogël mendimtarësh që thonë se të gjithë të rinjtë kanë dështuar.
Por, kjo është e reja. Çdo gjë që ndodh për herë të parë, ka dështuar para se të ndodhte. S’mund të ikim me idenë se të gjithë ata që kanë provuar, kanë dështuar. Duan të na bindin se s’ka ndryshim tjetër veç PS e PD? Na tregojnë historira, bëjnë lista me arsyet se përse ne nuk do ia dalim.
Unë jam mësuar të më thonë “nuk do ia dalësh”, por kjo më ka ndihmuar akoma më shumë të ngul këmbë. Isha i vetëdijshëm që do ishte e vështirë kur ishim 5, apo 100, ndërsa e shoh ndryshe tani që jemi dhjetëra mijëra. Ne jemi njerëz që vijmë nga puna, nuk jemi qaramanë. E kemi treguar në jetën tonë. Ia kemi dalë nga hiçi, dhe kështu do ia dalim edhe me atë që po bëjmë sot.
Nga sot deri në 11 Maj, askush nuk mund të prekë një votë të Partisë Mundësia. Votën e atyre që duan ndryshimin nuk e prek askush. Ju jap fjalën, askush nuk mund ta prekë votën tonë”, u shpreh Shehaj.
