
Nga Daniel Muçaku-
Sa kemi hyrë në zonën e nxehtë të fushatës elektorale. Si gjithë fushatat dhe tradita e keqe politike e këtyre 34 viteve, prapë akuzojmë dhe shajmë, por nuk debatojmë për programet apo premtimet
Para pak ditësh Sali Berisha sulmoi pa asnjë fakt real, ish-kryeministrin socialist Pandeli Majko. Ky i fundit, mund të akuzohet se përdori pushtetin e PS për t’i dhënë dorën liderit demokrat në vitin 1999, por kurrsesi nuk mund ti thuhet se Majko ishte i korruptuar. Por Berisha e bëri me “barrë” Pandeli Majkon duke i thënë se ka ndarë euro për fushatë, kur më pas doli se emrat e përmenduar as që ekzistonin në Kukës asokohe, në fushatë.
Teoria “shpif, shpif se diçka mbetet”, është më e keqja e këtyre vitëve politikë pluraliste shqiptare. Edhe PS e ka përdorur këtë gjuhë në kohën e Fatos Nanos kundër kreut të PD, Sali Berisha.
Ndërkohë që po hyjmë në muajt-zjarr të fushatës, këto ditë është ngritur një mal sulmesh ndaj zv/kryeministres Belinda Balluku. Natyrisht që ajo duhet ta ketë marrë parasysh qëkur ka hyrë në politikë se do ta sulmojnë, akuzojnë dhe masakrojnë kundërshtarët politikë.
Çuditërisht ka një sinkron të habitshëm sulmi nga opozita ndaj Belinda Ballukut, ku edhe fije mazhorance të përzier me segmente në PD, po rakordojnë goditjen për ta stepur në fushatën e saj elektorale, e cila duhet pranuar se është me njerëzorja në raport me krejt morinë e drejtuesve politikë në rrethe.
Unë ndjek si gazetar pothuaj të gjitha takimet e deputetëve të PD-së dhe PS-së në rrethe dhe në kryeqytet. Fjala vjen fushata e Jorida Tabakut nga PD është korrekte. Dhe ka sukses se nuk shan apo shpif si disa në Selinë Blu.
Nga kampi mazhoritar ka një sërë figurash politike në fushatë, por ajo që bën Belinda Balluku është për t’u admiruar; e thjeshtë, tokësore, bashkëpunuese, jo konfliktuale, bile edhe kur takon në qarkun Fier demokratë salistë ajo sillet njerëzisht.
Sulmet ndaj saj këto ditë duken sinkron me tymçet që ish-pushtetarë që kanë hallin e vetvetes, por që nuk kanë folur kur ishin majë kalit; pra duan ta godasin siç bënë me Pandeli Majkon. Synimi duket se është që t’i zbehin dëshirën për fushatë duke humbur ritmin e përditshëm e të deritashëm, me elektoratin.
Fushata ka filluar egër dhe do të kemi edhe me keq se kaq, si dikur kur Edi Ramës çfarë nuk i përmendnin kur kandidonte për kryebashkiak, e që para pak ditësh vetë kryeministri doli në një videomesazh. E keni dëgjuar, se ç’tha Rama për çfarë i kanë sajuar atij dikur!
Edhe ndaj Belinda Balluku qëllimi duket hapur, duan ta thyejnë, ta dekurojnë në fushatë, që qarku Fier, aty ku është bastioni i majtë të mos dalë siç ka pikësynim Belinda.
Natyrisht edhe xhelozi brenda llojit ka, dhe si kudo, kjo luftë të krijon dyshimin të rrish syhapur edhe pas krahëve.