Kryeministri Edi Rama ishte këtë të diel pasdite në një takim elektoral me gratë dhe vajzat në Kamëz.
Duke folur para tyre, ai tha se më 11 maj, shqiptarët kanë fatin në dorë për të vendosur për historinë e vendit, drejt Perëndimit.
Rama akuzoi opozitën se kërkon vota për hallin e Sali Berishës, duke e cilësuar këtë të fundit si “bufin e kënetës”.
Ai u bëri thirrje qytetarëve që më 11 maj të votojnë për interesat e tyre dhe jo për të shkuar, sipas tij, bashkë me bufin dhe kënetën në gropë.
“Më 11 maj, shqiptarët duhet të zgjedhin mes interesit të tyre apo hallit të një bufi të vetëm. Duhet të zgjedhin Shqipërinë me BE-në apo të zgjedhin të shkojnë me bufin dhe kënetën në grope. Është e paimagjinueshme si mund të vihet në diskutim. Nuk e kuptoj ose një pjesë e tyre janë çyrykë dhe nuk e dinë si zhvillohet integrimi në BE, duke më thënë mua se kam 12 vjet dhe nuk e çova vendin në BE. Po Mali i Zi që i ka hapur negociatat që në vitin 2012, pse nuk ka hyrë? Po Serbia që i ka hapur në 2014, pse nuk ka hyrë? Po Maqedonia që është bërë vend kandidat në 2005, pse nuk ka hyrë? Sepse BE nuk funksionon siç do, dhe çfarë bëjmë ne por çfarë interesi ka vetë BE. Sot, përputhet ajo që ne duam prej 500 vitesh, integrimi në BE, me atë që do Bashkimi Europian”, tha Rama.
Rama shtoi se Partia Socialiste dhe ai do të marrin sigurisht shumicën absolute, por është e nevojshme një shumicë që të mos e mbajë peng procesin e negociatave me BE-në dhe që të dërgojë një mesazh të qartë për vendet e Bashkimit Europian. Ai theksoi se ato po ndjekin situatën dhe presin të shohin nëse shqiptarët kanë një shumicë që e do BE-në. Në lidhje me Partinë Demokratike, Rama tha se kjo forcë ka kohë që nuk ka një alternativë për shqiptarët dhe që sipas tij është një mbetje që vazhdon të funksionojë në inercinë e saj. Ai u ndal edhe tek primaret e PD-së, duke komentuar se të gjithë ata që dolën nga primaret iu “pre koka”.
“Bufi e hengri kreun e Kavajës që fitoi primaret, i hengri të gjithë. Më 11 maj do të marrin humbjen më të madhe që nga viti 1997 do te dalin të shpartalluar ashtu siç e meritojnë por ata meritojnë që shpartallimi tu vijë dhe nga vetë demokratët”, tha Rama.
