Agron Shehaj i është përgjigjur Flamur Nokës, pasi ky i fundit e akuzoi duke thënë se vëllai i kreut të “Mundësisë” kishte marrë tender nga qeveria.
Në video mesazhin e publikuar, Shehaj thotë se të gjitha akuzat e Nokës janë shpifje e gënjeshtra.
Shehaj i thotë Nokës ta vazhdojë ta sulmojë, pasi kjo tregon qartë kontrastin mes të dyve, pasi të gjithë e dinë që ai është pasuruar me punë të ndershme, ndërsa po ashtu e dinë se cili është Flamur Noka.
Sipas Shehajt, kur thotë se kërkon ndryshim dhe jo rotacionin, kjo i drejtohet pikërisht Nokës, pasi nuk mund të zëvendësohet një mashtrues si Taulant Balla me një mashtrues tjetër si Flamur Noka, apsi për shqiptarët nuk do të ndryshonte asgjë.
Mesazhi i Agron Shehaj:
Tani do ju tregoj një histori. Mbrëmë Flamur Noka rifilloi shpifjet ndaj meje. Doli në Tv A2, tv-ja e aferës Thumanë – Kashar dhe Unazës së madhe, dhe shpifi duke thënë se unë paskam fituar një tender. Komplet shpifje, gënjeshtër.
Mbrëmë fola me një mikun tim që është akoma brenda PD-së dhe i thashë: Ore, sa i pafytyrë ky Flamuri, si mund të shpikë në këtë mënyrë?
“Dëgjomë”, tha, “Flamuri ka 30 vjet që vetëm shpif në PD, kështu e ka mbajtur postin. Harrove çfarë i bënë Jozefina Topallit, zonja e hekurt e PD-së? I thanë që ishte shitur te Rama, patericë e Ramës, e kështu me radhë. Mos u habit, Flamuri nuk mund të flasë për të ardhmen, di vetëm të shpifë, kështu ka qenë në këto 30 vjet”.
Tani kam një mesazh për Flamurin. Flamur, vazhdo dhe gënje, vazhdo dhe më sulmo, mos e vrit mendjen fare, je në rrugën e duhur. Kontrasti me ty është mënyra më e mirë për t’ju treguar të gjithëve kush jam unë. Nuk ka njeri në Shqipëri që nuk e di kush jam unë e kush je ti. Unë jam pasuruar me punë Flamur.
Kur them që nuk dua vetëm rotacion por ndryshimin, e kam pikërisht për ty. Nëse ikën Taulant Balla dhe vjen ti Flamur, nuk ndryshon asgjë për shqiptarët. Nga një mashtrues në një mashtrues tjetër”, thotë Shehaj.
