Arlind Qorri: Votoni Lëvizjen Bashkë Nr: 
3
Drejtuesi i “Lëvizja Bashkë”, Arlind Qori, ishte i ftuar në emisionin “Të Paekspozuarit”, në MCN TV.
I pyetur për fushatën modeste që bën partia e tij, Qori tha se politikanët e korruptuar përpiqen të blejnë vota me para, pasi kanë humbur respektin e qytetarëve, ndërsa “Lëvizja Bashkë” bën një fushatë modeste, pa shumë para, duke u mbështetur te përkushtimi i aktivistëve.
“Paraja u duhet atyre që kanë humbur respektin e popullit ndaj tyre, paraja iu duhet të korruptuarve, atyre që kanë vjedhur këto 34 vjet sepse nëpërmjet parasë, ende shpresojnë se do të bindin një pjesë të shoqërisë që t’i votojë ata.
Ne nuk na duhen shumë para, na duhen jashtëzakonisht pak para.
Na duhen para sa për të printuar një fletushkë të thjeshtë, edhe në një pjesë të Shqipërisë sa për t’i hedhur naftë një makine.
Unë ngrihem në orën gjashtë e gjysmë zakonisht edhe hipim tre-katër vetë në një makinë dhe në qytete të tjera na presin aktivistët tanë që banojnë në ato qytete.
Aty shkojmë në çdo treg, shkojmë në çdo derë qytetarësh, flasim me njerëzit dhe shumica dërrmuese e njerëzve, jo vetëm na japin të drejtë, po edhe na mirëpresin.
Në të rrallë na ndodh që thotë edhe dikush plaç, po jemi mësuar, sepse duke takuar qindra-qindra njerëz çdo ditë e shumë më tepër pastaj gjatë javëve edhe muajit të fushatës jemi mësuar me gjithçka.
Fushata jonë është autentike, është shprehje e frymës tonë. Ne besojmë te një politikë e ndershme, te e vërteta politike dhe shoqërore, ne besojmë te stili i thjeshtë i të bërit politikë, kjo e shoqëruar me ide të mëdha.
“Lëvizja Bashkë”, nëse do të zgjedhë një deputet, ky nuk do të jetë unë, por shoku im Redi Muçi. Në kemi shumë figura shumë të mira politike dhe profil në ngritje që mund ta bëjnë më mirë se unë. Unë nuk flas më shumë se të tjerët dhe nuk përqendrohet vëmendja te unë. Këta njerëz, nëse qytetarët na besojnë me votë, do të qeverisin Shqipërinë”- tha Qori.
