Prokuroria e Posaçme kërkon në GJKKO masën e sigurisë “arrest në burg” për dy shefat e Rrugores së Tiranës, Roven Zeka dhe Sokol Novaku. Të dy oficerët e lartë akuzohen nga SPAK për veprën penale të korrupsionit, teksa një ditë më parë është dhënë masa e sigurisë “arrest me burg” edhe për efektivin e Policisë Rrugore, Edison Tabaku.
Të tre efektivët akuzohen se kanë kërkuar dhe marrë pagesën 2 mijë euro nga biznesmeni Erges Vrioni, për të mos i arrestuar bashkëshorten që kishte shkaktuar një aksident. Arrestimet u bënë më 19 prill, menjëherë pas zbulimit të rastit, teksa Prokuroria ka zbardhur nëpërmjet përgjimeve edhe bisedat dhe aferën korruptive.
Sipas dosjes hetimore, duke qenë se polici Tabaku e njihte Erges Vrionin, bashkëshortin e gruas që bëri aksidentin, i ka kërkuar shuma monetare për të mos e arrestuar Anisa Vrionin. Një mijë euro i janë dhënë punonjësit të Policise Edison Tabaku, pranë banesës së tij. Vetë Tabaku e ka takuar sërish Erges Vrionin në një lokal pranë komisariatit të policisë rrugore dhe i ka kërkuar edhe një mijë euro të tjera, pasi i thotë “kam persona të tjerë mbi kokë”.
Nga verifikimi që i është bërë telefonit të Tabakut rezulton se ai ka komunikime me shefat e tij, Roven Zeka dhe Sokol Novaku, ku i thotë se 1000 eurot e tjera do t’i siguronte më vonë nga Vrioni, të cilin e kishte shok, duke i lënë afat deri të nesërmen.
Një nga tre blutë në kryeqytet, të arrestuar për korrupsion, është lënë sot (21 prill) nga gjykata në masën “arrest me burg”. Para gjykatës ka dalë oficeri i policisë gjyqësore Edison Tabaku, ndërsa dy të arrestuarit e tjerë drejtuesi Roven Zeka dhe Sokol Novaku do të dalin të martën (nesër, 22 prill). SPAK thotë se ata i morën 2 mije euro nga bashkëshorti biznesmen i një shoferes që kishte shkaktuar aksident me 5 të plagosur.
