Kryeministri Edi Rama komentoi sondazhin e McLaughlin & Associates, në bashkëpunim me Top Channel, i cili u transmetua një natë më parë në emisionin Top Story në Top Channel.
Ai e cilësoi CEO-n e McLaughlin & Associates, John McLaughlin si një ndër sondazhistët më të mirët në Amerikë.
Kryesocialisti i konsideroi shifrat e sondazhit shumë domethënëse.
“Jam çuar sot në mëngjes herët pa fjalë për shkak se mbrëmë pasi i mbaruam të gjitha dhe pasi i mbarova dhe ato ça kisha për të bërë vetë isha i interesuar të shikoja se në një nga kanalet televizive ishte njeriu i sondazheve të Donald Trumpit i cili është një ndër sondazhistët më të mirë të Amerikës.
Për hir të së vërtetës ai në Amerikë këmbëngulte që opinioni publik anonte nga Trump ndërkohë që shumica dërrmuese këmbëngulte të kundërtën, në fund i doli fjala.
Isha kurioz të shikoja çfarë kishte nxjerrë ai si konkluzion nga anketimi i parë dhe duke qenë se unë nuk shoh TV kur është fjala për këto sallonet e berberhanet e natës që nga 2009 nuk i shoh, ndonjëherë shumë rrallë ishte hera e dytë pas shumë kohësh, futem në Youtube dhe i shikova me pjesë.
Hyra aty, kapa një pjesë që kishte marrë opinionet e publikut, kishte nxjerrë që 50% e shqiptarëve mendojnë se vendi po ecën në drejtimin e duhur, ndërkohë që një pjesë tjetër 40 e ca mendon se po ecën në drejtimin e gabuar dhe të tjerët s’kishin mendim, gjysma ishin në idenë që vendi po ecën në drejtimin e duhur që është një gjë shumë domethënëse dhe për hir të së vërtetës në kohën e sotme është shumë e rrallë”, tha Rama.
