Kryeministri Edi Rama ishte sot në Skrapar për takimin e radhës elektoral për zgjedhjet e 11 majit.
Rama kërkoi në Skrapar votën për Partinë Socialiste, për të çuar para negociatat për anëtarësimin në Bashkimin Evropian.
Kryeministri vijoi dhe sulmet ndaj opozitës duke e quajtur një kënetë që duhet tharë. Rama shtoi se në tryezën e bisedimeve duhet ulur pa pasur në këmbë speciet e kënetës.
“Më 11 maj ne të gjithë do shkojmë në zgjedhje jo si gjithmonë për të caktuar një qeveri. Por do shkojmë në zgjedhje në takim me historinë. Do duhet të bëhemi sa më shumë, sa më të bashkuar për të vendosur me votën tonë krijimin e një fuqie më të madhe vendimmarrëse. Që këtë mundësi të madhe, dera për në BE, ne ta shfrytëzojmë duke mbyllur negociatat brenda 2027-ës”, tha Rama.
Ai theksoi se “këneta është bërë pengesë e vazhdueshme e këtij vendi”.
“I mbyllim vetëm nëse kemi një fuqi që na jep mundësinë që të gjithë ato që diskutojmë në tryezë, në të gjithë drejtimet të mund t’i bëjmë pa hasur pengesa në parlament, pa pasur në këmbë speciet e kënetës. Ta shtyjmë fort Shqipërinë për në BE dhe të thajmë kënetën. Është bërë pengesë e vazhdueshme e këtij vendi. E keni parë se ajo që kemi arritur me vendosjen e barazisë para ligjit, në anën tjetër kemi bufin e kënetës se përbetohet me votën e shqiptarëve do ta përmbysë reformën në drejtësi. Ne nuk lejojmë që historia të kthehet aty ku ishte. Vetëm duke e futur Shqipërinë në BE, garantojmë për brezat se barazia para ligjit është e paprekshme”, deklaroi Rama.
