Kryetari i Partisë Demokratike, Sali Berisha, ka zhvilluar sot takime elektorale në Vorë dhe Kashar, në kuadër të fushatës për zgjedhjet vendore të 11 majit. Në fjalën e tij, ai u ndal te rëndësia e familjes shqiptare, duke akuzuar kundërshtarin politik, Edi Rama, për një fushatë që, sipas tij, cenon vlerat familjare.
“Familja është themeli i gjithë themeleve në shoqërinë tonë. Një komb i fortë ndërtohet mbi një familje të fortë – me moral, dashuri dhe mirëqenie,” u shpreh Berisha.
Ai theksoi se Partia Demokratike ka në qendër të programit të saj familjen shqiptare dhe premtoi mbështetje për shkollimin, punësimin dhe strehimin e të rinjve.
Duke folur për retorikën e kundërshtarëve politikë, Berisha akuzoi kryeministrin Rama për përdorim të një gjuhe fyese dhe përpjekje për të devijuar vëmendjen publike nga problemet reale të qytetarëve.
“Asnjë grua nuk pranon t’i shahet djali apo bashkëshorti. Kjo fushatë vulgare e Ramës ka për qëllim të zhvlerësojë familjen. Nuk ka shqiptar që pranon të dëgjojë etiketime fyese për anëtarët e familjes së tij,” tha Berisha.
Ai shtoi se përparësia e tij është që “djemtë dhe vajzat e kësaj familjeje të mos marrin rrugën e emigrimit, por të ndërtojnë jetën dhe ëndrrat e tyre në Shqipëri.”
